പള്ളുരുത്തി: ഇടക്കൊച്ചി മേഖലയില് ഭൂമാഫിയ വീണ്ടും സജീവമാകുന്നു. കണ്ണങ്ങാട്ട് പാലത്തിന് സമീപം ഇന്ദിരാഗാന്ധി റോഡില് സ്വകാര്യ വ്യക്തിയുടെ ഒരേക്കറോളം വരുന്ന തണ്ണീര്ത്തടമാണ് നികത്തുന്നത്. ഡാറ്റാ ബാങ്കിലുള്പ്പെട്ട തണ്ണീര്ത്തടമായതിനാല് തരം മാറ്റാന് അനുമതി നിഷേധിച്ച സ്ഥലമാണിത്. ഒരേക്കറോളം വരുന്ന തണ്ണീര്ത്തടത്തിന്റെ കുറെയേറെ ഭാഗം നിലവില് നികത്തിയിട്ടുണ്ട്. വില്ലേജ് ഓഫിസ് തുറക്കുന്നതിന് മുമ്പും അടച്ചതിനുശേഷവുമാണ് ഇവിടെ നികത്തല് നടത്തുന്നത്. ഭൂമാഫിയ സംഘങ്ങളുടെ അകമ്പടിയോടെയാണ് പൂഴിമണല് നിറച്ച ലോറി തണ്ണീര്ത്തടത്തിന് സമീപം എത്തിക്കുന്നത്.
നികത്തുന്നത് ചോദ്യം ചെയ്യുന്നവരെ ഭീഷണിപ്പെടുത്തുന്നതായും പ്രദേശവാസികള് പറയുന്നു. വലിയ ടോറസില് തണ്ണീര്ത്തടത്തിന് സമീപമുള്ള സ്വകാര്യ വ്യക്തിയുടെ പുരയിടത്തില് പൂഴിമണല് നിറച്ച ലോറി എത്തിച്ചശേഷമാണ് നിക്ഷേപിക്കുന്നത്. രൂക്ഷമായ വെള്ളക്കെട്ട് പ്രശ്നം നേരിടുന്ന പ്രദേശമാണിത്. തണ്ണീര്ത്തടം നികത്തിയാല് വെള്ളക്കെട്ട് ഗുരുതരമാകുമെന്ന് നാട്ടുകാര് പറയുന്നു .
നികത്തിയ തണ്ണീര്ത്തടം പൂര്വസ്ഥിതിയിലാക്കണമെന്നാണ് നാട്ടുകാരുടെ ആവശ്യം. നികത്തല് നടക്കുമ്പോള് വില്ലേജ് അധികൃതര് സ്റ്റോപ്പ് മെമ്മോ നല്കുമെങ്കിലും തുടര് നടപടികള് സ്വീകരിക്കുന്നില്ലെന്നാണ് പരാതി. നികത്തിയ തണ്ണീര്ത്തടം പൂര്വ സ്ഥിതിയിലാക്കണമെന്നാവശ്യപ്പെട്ട് ഗ്രീന് കൊച്ചി പ്രസിഡന്റ് വി.കെ. അരുണ്കുമാര് കലക്ടര്ക്ക് പരാതി നല്കിയിട്ടുണ്ട് .
