ഇലവുംതിട്ട : ബോധരഹിതയായി റോഡിൽ കിടന്ന വൃദ്ധമാതാവിനെ കോഴഞ്ചേരി ജില്ലാ ആശുപത്രിയിലെത്തിച്ച് ഇലവുംതിട്ട ജനമൈത്രി പോലീസ്. ഒറ്റക്ക് താമസിക്കുന്ന തവിട്ടപൊയ്കയിലെ സദാനന്ദപുരം സോമവല്ലി (75) പനി രൂക്ഷമായി റോഡിൽ വീണു കിടക്കുന്നതായി അയൽവാസിയാണ് പോലീസിനെ അറിയിക്കുന്നത്. കോവിഡ് കാലത്ത് നിരവധി അസുഖങ്ങൾ അലട്ടുന്ന മാതാവിനെ ആശുപത്രിയിലെത്തിക്കാൻ പോലീസിനെ അറിയിച്ചയാളെ പോലും അത്ഭുതപ്പെടുത്തിയാണ് പൊടുന്നനെ പോലീസെത്തിയത്. എസ് എച്ച് ഒ എം.ആർ.സുരേഷിന്റെ നിർദ്ദേശപ്രകാരം ജനമൈത്രി ബീറ്റ് ഓഫീസർമാരായ എസ്. അൻവർഷ, ആർ പ്രശാന്ത്, വളണ്ടിയർ അഭിരാം എന്നിവർ ചേർന്ന് സ്വകാര്യ വാഹനത്തിൽ ഇവരെ കോഴഞ്ചേരി ജില്ലാ ആശുപത്രിയിലെത്തിച്ച് അഡ്മിറ്റ് ചെയ്തു.
