തിരുവനന്തപുരം : വാണിജ്യ വ്യവസായ സ്ഥാപനങ്ങളുടേയും സ്വകാര്യ ആശുപത്രികളുടേയും ലോക്ക് ഡൗണ് കാലയളവിലെ (മാര്ച്ച്, ഏപ്രില്, മേയ്) വൈദ്യുതി ബില്ലിലെ ഫിക്സഡ് ചാര്ജില് 25 ശതമാനം ഇളവ് നല്കുന്നതിന് വൈദ്യുതി ബോര്ഡ് തീരുമാനിച്ചു. ഫിക്സഡ് ചാര്ജിലെ ബാക്കി തുക അടയ്ക്കുന്നതിന് ഡിസംബര് വരെ സാവകാശം നല്കുന്നതിനും അതിന് ഈ കാലയളവില് പലിശ ഈടാക്കേണ്ടതില്ലെന്നും തീരുമാനിച്ചു.
ബില് തുക വര്ധിക്കുന്നതായുള്ള ഗാര്ഹിക ഉപയോക്താക്കളുടെ പരാതികള് പരിശോധിക്കാന് നിര്ദേശം നല്കി. ബില് തുക ഒന്നിച്ച് അടക്കുന്നതിന് പ്രയാസമുള്ള ഉപഭോക്താക്കള്ക്ക് ലോക്ക് ഡൗണ് കാലയളവിലെ വൈദ്യുതി ബില്ലുകളില് പകുതി അടച്ചാല് ബാക്കി തുകയ്ക്ക് രണ്ടു തവണകള് അനുവദിക്കുന്നതിനും തീരുമാനിച്ചു. ലോക്ക് ഡൗണ് കാലയളവില് കുടുംബാംഗങ്ങളെല്ലാം വീടുകളില് ഉണ്ടായിരുന്ന സാഹചര്യത്തിലാണ് വൈദ്യുതി ഉപയോഗത്തില് വലിയ വര്ധന ഉണ്ടായതെന്നു ബോര്ഡ് വിലയിരുത്തുന്നു.
