കുന്നംകുളം : മക്കളെ ഉപേക്ഷിച്ച് പോയ യുവതിയെയും കാമുകനെയും കുന്നംകുളം പോലീസ് അറസ്റ്റ് ചെയ്തു. ജുവനൈല് ജസ്റ്റിസ് ആക്ട് പ്രകാരമാണ് കേസ്. ഭര്തൃമതിയും 10, 12 വയസ്സുള്ള കുട്ടികളുടെ അമ്മയുമായ കുന്നംകുളം കാണിപ്പയ്യൂര് സ്വദേശിനിയെയും കാമുകനായ വടക്കഞ്ചേരി സ്വദേശിയെയുമാണ് പോലീസ് അറസ്റ്റ് ചെയ്തത്. ഭാര്യയും ഒരു കുട്ടിയുമുള്ളയാളാണ് കാമുകന്.
കഴിഞ്ഞ 27 നാണ് യുവതി വീട്ടില് നിന്നും ഇറങ്ങിപ്പോയത്. യുവതിയുടെ ഭര്ത്താവിന്റെ പരാതിയില് കുന്നംകുളം പോലീസ് അന്വേഷണം നടത്തി വരുന്നതിനിടെ ഇരുവരും തൃശൂരില് വാടകക്ക് താമസിക്കുന്നതായി കണ്ടെത്തുകയായിരുന്നു. തുടര്ന്നാണ് കുന്നംകുളം സിഐ വി സി. സൂരജിന്റെ നേതൃത്വത്തില് ഇവരെ അറസ്റ്റ് ചെയ്തത്. കോടതിയില് ഹാജരാക്കിയ രണ്ടുപേരെയും 14 ദിവസത്തേക്ക് റിമാന്ഡ് ചെയ്തു.
