തിരുവനന്തപുരം; പ്രതിപക്ഷ നേതാവ് വി.ഡി സതീശനെതിരെ എല്ഡിഎഫ് കണ്വീനര് ഇ പി ജയരാജന്. വി.ഡി സതീശന് നിയമസഭയില് അനാവശ്യ വിവാദങ്ങളുണ്ടാക്കുകയാണെന്ന് ഇ പി ജയരാജന് ആരോപിക്കുന്നു. സ്പീക്കറുടെ ഓഫീസ് ഇതുവരെ ഉപരോധിച്ച ചരിത്രമില്ല. നിയമസഭ കോപ്രായങ്ങളുടെ വേദിയാക്കരുതെന്നും അദ്ദേഹം കുറ്റപ്പെടുത്തി. പ്രാധാന്യമില്ലത്ത വിഷയങ്ങള് അടിയന്തിര പ്രമേയമായി കൊണ്ടുവരുന്നു. വഴിവിട്ട വാക്കുകളാണ് പ്രതിപക്ഷ നേതാവ് സഭയില് ഉപയോഗിക്കുന്നത്. നിയമസഭയുടെ അന്തസ് കാക്കാന് പ്രതിപക്ഷ നേതാവ് തയാറാവണമെന്നും ഇ.പി ജയരാജന് പറഞ്ഞു.
അതേസമയം കെപിസിസി അധ്യക്ഷന് കെ സുധാകരനെതിരയും ഇ.പി നേരത്തെ രംഗത്ത് വന്നിരുന്നു. മുഖ്യമന്ത്രിക്കെതിരായ പരാമര്ശത്തിലാണ് അദ്ദേഹത്തിന്റെ വിമര്ശനം. സ്വബോധമുള്ള ഒരാള്ക്കും മുഖ്യമന്ത്രി പിണറായി വിജയനെ ഇത്തരത്തില് വിശേഷിപ്പിക്കാന് കഴിയില്ലെന്നും സുധാകരന് കാര്യമായി എന്തോ സംഭവിച്ചിട്ടുണ്ടെന്നും ഇ പി ജയരാജന് പറഞ്ഞിരുന്നു.
