കണ്ണൂര്‍ : രാഷ്ട്രപതിയുടെ പേരില്‍ വ്യാജരേഖയുണ്ടാക്കിയ കേസില്‍ രണ്ടാം പ്രതി ഉമ്മര്‍ കുട്ടി അറസ്റ്റില്‍. സംഭവം പിടിക്കപ്പെട്ടതിന് ശേഷം ഒളിവില്‍ പോയ ഉമ്മറിനായി പോലീസ് ഊര്‍ജ്ജിത അന്വേഷണം തുടരുകയായിരുന്നു. ഇതിനിടയിലാണ് ഇയാളെ പോലീസ് പിടികൂടിയത്. പയ്യാമ്പലം സ്വദേശിയാണ് പി.പി ഉമ്മര്‍ കുട്ടി.
അതേസമയം ഉമ്മറിന്റെ സഹോദരന്‍ അഷ്‌റഫിനെ നേരത്തെ തന്നെ പോലീസ് അറസ്റ്റ് ചെയ്തിരുന്നു. പൊതുജനങ്ങള്‍ക്ക് പരാതി നല്‍കാനായി തയ്യാറാക്കിയ പോര്‍ട്ടലില്‍ രാഷ്ട്രപതിയ്ക്കുള്ള പരാതിയ്ക്കൊപ്പം അനുബന്ധ രേഖയായി രാഷ്ട്രപതിയുടെ വ്യാജ മറുപടിയും സ്‌കാന്‍ ചെയ്ത് കയറ്റിയായിരുന്നു ഇവര്‍ തട്ടിപ്പ് നടത്തിയത്. കെട്ടിടനിര്‍മ്മാണ ചട്ടങ്ങള്‍ ഇളവു ചെയ്തുവെന്ന രേഖയാണ് പ്രതികള്‍ ചേര്‍ന്ന് വ്യാജമായി നിര്‍മ്മിച്ചത്. ഫോര്‍ട്ട് റോഡിലെ ഉമ്മറുകുട്ടിയുടെ ഉടമസ്ഥതയിലുള്ള കെട്ടിടം ചട്ടം ലംഘിച്ച് നിര്‍മ്മിച്ചതാണെന്ന് കണ്ടെത്തിയതിനെ തുടര്‍ന്ന് പൊളിക്കാന്‍ നഗരസഭ ഉത്തരവിട്ടിരുന്നു.
ഇത് ഒഴിവാക്കുന്നതിന് വേണ്ടിയാണ് രാഷ്ട്രപതിയുടെ പേരില്‍ വ്യാജ രേഖ നിര്‍മ്മിച്ചത്. കെട്ടിടം പൊളിക്കാന്‍ എത്തിയ മുനിസിപ്പല്‍ സെക്രട്ടറിയ്ക്ക് ഇത് നല്‍കുകയും ചെയ്തിരുന്നു. എന്നാല്‍ ഉത്തരവ് മുനിസിപ്പല്‍ സെക്രട്ടറി പോലീസിന് കൈമാറി. ഇതില്‍ സംശയം തോന്നിയ പോലീസ് ഇരുവരെയും ചോദ്യം ചെയ്തതോടെയാണ് തട്ടിപ്പ് പുറത്തുവന്നത്.
