ന്യൂഡല്ഹി : കോവിഡ് വ്യാപനം കുറഞ്ഞതോടെ അന്താരാഷ്ട്ര വിമാന സര്വീസുകള് പുനരാരംഭിക്കുന്നു. ഈ മാസം 27 മുതല് സര്വീസുകള് വീണ്ടും തുടങ്ങും. കോവിഡിന്റെ പശ്ചാത്തലത്തില് നിര്ത്തിവെച്ച വിമാന സര്വീസുകള് പുനരാരംഭിക്കാന് തീരുമാനിച്ചതായി വ്യോമയാന മന്ത്രാലയം അറിയിച്ചു. ഇതുവരെ എയര് ബബിള് സംവിധാനത്തിലുള്ള പ്രത്യേക സര്വീസുകള് മാത്രമാണ് ഉണ്ടായിരുന്നത്. കോവിഡ് കേസുകള് കുറഞ്ഞ സാഹചര്യത്തില് ഡിസംബര് 15 മുതല് രാജ്യാന്തര വിമാന സര്വീസുകള് പുനരാരംഭിക്കാന് കേന്ദ്രസര്ക്കാര് തീരുമാനിച്ചിരുന്നു.
എന്നാല് ഒമിക്രോണ് വ്യാപനം രാജ്യത്ത് ഉണ്ടായതിനെ തുടര്ന്ന് തീരുമാനം നീട്ടിവെയ്ക്കുകയായിരുന്നു. പിന്നീട് ഫെബ്രുവരിയില് രാജ്യാന്തര വിമാന സര്വീസിന് ഏര്പ്പെടുത്തിയ നിയന്ത്രണം അനിശ്ചിതമായി നീട്ടാനും തീരുമാനിച്ചിരുന്നു. എന്നാല് രാജ്യത്ത് നിലവില് പ്രതിദിന കോവിഡ് കേസുകള് 5000ല് താഴെ എത്തിയ സാഹചര്യത്തിലാണ് വിമാന സര്വീസ് പുനരാരംഭിക്കാന് കേന്ദ്രസര്ക്കാര് തീരുമാനിച്ചത്.
