മല്ലപ്പള്ളി : 2021 ഒക്ടോബർ 16, 17 തിയതികളിൽ മണിമല ആറ്റിൽ ഉണ്ടായ മിന്നൽ പ്രളയത്തിൽ കോട്ടാങ്ങൽ പഞ്ചായത്തിൽ വീടിന് നാശനഷ്ടം നേരിട്ടവർക്കുള്ള ധനസഹായ വിതരണ പ്രഖ്യാപനവും സ്മാർട്ട് വില്ലേജ് ഓഫിസ് നിർമ്മാണോദ്ഘാടനവും തിങ്കളാഴ്ച നടക്കുമെന്ന് പ്രമോദ് നാരായണൻ എം എൽ എ വാർത്താ സമ്മേളനത്തിൽ അറിയിച്ചു. രാവിലെ 10 ന് കുളത്തൂർ ദേവി ക്ഷേത്രം ഓഡിറ്റോറിയത്തിൽ നടക്കുന്ന ചടങ്ങിൽ റവന്യൂ- ഭവന നിർമ്മാണ വകുപ്പ് മന്ത്രി കെ.രാജൻ ഉദ്ഘാടനം ചെയ്യും. ആന്റോ ആന്റണി എംപി മുഖ്യാതിഥിയായിരിക്കും.
ജില്ലാ പഞ്ചായത്ത് പ്രസിഡന്റ് ഓമല്ലൂർ ശങ്കരൻ മുഖ്യ പ്രഭാഷണം നടത്തും. പഞ്ചായത്തിന്റെ വിവിധ ഭാഗങ്ങളിൽ ഉണ്ടായ മിന്നൽ പ്രളയത്തിൽ പഞ്ചായത്തിന്റെ വിവിധ ഭാഗങ്ങളിൽ ഉണ്ടായ പ്രളയത്തിൽ 419 വീടുകൾ പ്രളയ ദുരിതാശ്വാസ ധനസഹായത്തിന് അർഹതയുള്ളതായി കണ്ടെത്തി 1,91,53,200 രൂപ ധനസഹായമായി സർക്കാർ അനുവദിച്ചിട്ടുണ്ട്. വാർത്താ സമ്മേളനത്തിൽ പഞ്ചായത്ത് പ്രസിഡന്റ് ബിനു ജോസഫ്, തഹസിൽദാർ വി.ജെ ജെയിംസ്, ഡപ്യൂട്ടി തഹസിൽദാർ ജി.ബിനു, എസ്.നായർ, സിപിഐ റാന്നി മണ്ഡലം സെക്രട്ടറി കെ.സതീശ്, അഖിൽ എസ് നായർ എന്നിവർ പങ്കെടുത്തു.
