ഇടുക്കി: അരിക്കൊമ്പന് എന്ന കാട്ടാനയെ പിടികൂടുന്നതിന് മുന്നോടിയായി നാളെ നടത്താനിരുന്ന മോക്ഡ്രില് മാറ്റി. ഇതുമായി ബന്ധപ്പെട്ട് കോടതി പരിഗണനയിലുള്ള കേസ് പരിഗണിച്ചാണ് നടപടി. കോടതി വിധി അനുകൂലമായാല് 30 ന് രാവിലെ നാലിന് ദൗത്യം തുടങ്ങും. എട്ടു സംഘങ്ങളെയാണ് ദൗത്യത്തിനായി നിയോഗിച്ചിരിക്കുന്നത്. സി സി എഫ് മാരായ നരേന്ദ്ര ബാബു, ആര് എസ് അരുണ് എന്നിവരുടെ നേതൃത്വത്തിലായിരിക്കും അരിക്കൊമ്പനെ മയക്ക് വെടി വെക്കുന്ന ദൗത്യം നടക്കുക.
8 സംഘങ്ങള്ക്കും ചെയ്യേണ്ട ജോലികള് ഡോക്ടര് അരുണ് സഖറിയ വിശദീകരിച്ചു നല്കി. ദൗത്യത്തിനു വേണ്ടിയുള്ള ഉപകരണങ്ങളും പരിചയപ്പെടുത്തി.ഓരോ സംഘത്തിന്റെ തലവന്മാര് നില്ക്കേണ്ട സ്ഥലവും നിശ്ചയിച്ചിട്ടുണ്ട്. അരിക്കൊമ്പനെ മയക്ക് വെടി വച്ച് പിടികൂടിയാല് കൊണ്ടുപോകാനുള്ള ബലപ്പെടുത്തിയ വാഹനവും തയ്യാറാണ്.
