ലക്നൗ : ഉത്തര്പ്രദേശിലെ കുശിനഗറില് മിഠായി കഴിച്ച നാലു കുട്ടികള് മരിച്ചു. വീടിന് സമീപം ആരോ കൊണ്ടുവെച്ച മിഠായികള് കുട്ടികള് എടുത്തുകഴിക്കുകയായിരുന്നെന്നാണ് കരുതുന്നത്. മിഠായി കഴിച്ചയുടനെ തളര്ന്നുവീണ കുട്ടികളെ ഉടനെ ജില്ലാ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. സംഭവത്തില് അന്വേഷണത്തിന് ഉത്തരവിട്ടിട്ടുണ്ടെന്നും കുറ്റവാളികള് രക്ഷപ്പെടില്ലെന്നും മുഖ്യമന്ത്രി യോഗി ആദിത്യനാഥിന്റെ ഓഫീസ് അറിയിച്ചു.
സമാനമായ സംഭവം മരിച്ച കുട്ടികളുടെ ബന്ധുവീട്ടില് രണ്ട് വര്ഷം മുമ്പുണ്ടായിരുന്നെന്നും വിശദമായ അന്വേഷണത്തിലൂടെ കുറ്റവാളികളെ പിടികൂടുമെന്നും ഖോരക്പൂര് മേഖല എ.ഡി.ജി അഖില് കുമാര് പറഞ്ഞു. വിഷം ചേര്ത്ത മിഠായികളാകും കുട്ടികള് കഴിച്ചതെന്നാണ് കരുതുന്നത്. പോസ്റ്റുമോര്ട്ടം റിപ്പോര്ട്ട് ലഭിച്ച ശേഷമേ സംഭവത്തില് കൂടുതല് വ്യക്തത വരൂ.
