തൃശൂര്: ഓണാഘോഷത്തിനിടെ അക്രമത്തിനെത്തിയ കുപ്രസിദ്ധ ഗുണ്ട കടവി രഞ്ജിത് അടക്കം മൂന്ന് കുറ്റവാളികളെ തൃശൂര് സിറ്റി പോലീസ് അറസ്റ്റ് ചെയ്തു.തൃശൂര് മാറ്റാംപുറം പൂളാക്കല് രഞ്ജിത് എന്ന കടവി രഞ്ജിത് (40), ഒല്ലൂര് നടത്തറ സ്വദേശി ലിന്റോ ബാബു (31), വിയ്യൂര് വില്വട്ടം സ്വദേശി അശ്വിന് (35) എന്നിവരെയാണ് കാപ്പ നിയമപ്രകാരം പോലീസ് അറസ്റ്റ് ചെയ്തത്. ഓണത്തോടനുബന്ധിച്ച് സുരക്ഷ ഒരുക്കുന്നതിന്റെ ഭാഗമായി നടത്തിയ തിരച്ചിലില് ഒട്ടേറെ പ്രതികളും പിടിയിലായിട്ടുണ്ട്. ആഘോഷങ്ങളുടെ മറവില് കുറ്റകൃത്യങ്ങള്ക്ക് തയ്യാറെടുത്തിരുന്ന 14 പിടികിട്ടാപുള്ളികള് പിടിയിലായി.
ജാമ്യത്തിലിറങ്ങി മുങ്ങി നടന്നിരുന്ന 114 വാറണ്ട് പ്രതികളേയും ഇക്കൂട്ടത്തില് അറസ്റ്റുചെയ്തു. വ്യാജവാറ്റ്, അനധികൃത മദ്യം കൈവശം വെക്കല് തുടങ്ങിയ കുറ്റകൃത്യങ്ങള്ക്ക് 6 അബ്കാരി കേസുകള് രജിസ്റ്റര് ചെയ്തു. കഞ്ചാവ് കൈവശംവെച്ച് വില്പ്പന നടത്താന് ശ്രമിച്ചതിനും, മറ്റ് മയക്കുമരുന്നുകള് ഉപയോഗിച്ചതിനും 10 കേസുകള് രജിസ്റ്റര് ചെയ്തു. ഇതുകൂടാതെ, ഓണാഘോഷത്തിന് അക്രമമുണ്ടാക്കാന് സാധ്യതയുള്ള 13 പേരെ കരുതല് തടങ്കലിലാക്കുകയും ചെയ്തു. മദ്യപിച്ച് വാഹനമോടിച്ചതിന് 128 പേരാണ് പോലീസ് പിടിയിലായത്. പരിശോധനകള് വരും ദിവസങ്ങളിലും തുടരുമെന്ന് സിറ്റി പോലീസ് കമ്മീഷണര് ആര് ആദിത്യ അറിയിച്ചു.
