തിരുവനന്തപുരം : വീടിന് തീപിടിച്ച് കുടുംബത്തിലെ അഞ്ച് പേര് മരിച്ച സംഭവത്തില് അന്വേഷണം തുടരുന്നെന്ന് റൂറല് എസ് പി ദിവ്യ ഗോപിനാഥ്. ഷോര്ട്ട് സര്ക്യൂട്ട് ആണോ അപകടത്തിന് കാരണമെന്ന് പരിശോധിക്കുകയാണെന്നും റൂറല് എസ് പി അറിയിച്ചു. ഷോര്ട്ട് സര്ക്യൂട്ടാണോ തീപിടിത്തത്തിന് കാരണമെന്ന് വ്യക്തമല്ലെന്ന് ഫയര്ഫോഴ്സ് ഉദ്യോഗസ്ഥന് ഡാര്വിന് പറഞ്ഞു. വീടിനകത്ത് ഉണ്ടായത് വന് തീപിടിത്തമാണെന്നും, വീടിന്റെ മുകള്നിലയില് കിടന്ന് ഉറങ്ങിയവര് പുക ശ്വസിച്ചാണ് മരിച്ചതെന്നും ഡാര്വിന് ഒരു സ്വകാര്യ ചാനലിനോട് പറഞ്ഞു.
വീടിന് മുന്നില് പാര്ക്ക് ചെയ്ത ബൈക്കുകള്ക്കും തീപിടിച്ചിട്ടുണ്ട്. ബൈക്കിലെ പെട്രോളില് നിന്നാണോ തീപടര്ന്നതെന്ന് പരിശോധിക്കണമെന്ന് ഫയര്ഫോഴ്സ് ഉദ്യോഗസ്ഥന് വ്യക്തമാക്കി. പുത്തന്ചന്തയിലെ പച്ചക്കറി വ്യാപാരിയായ പ്രതാപന് (64), ഭാര്യ ഷെര്ളി (53), മകന് അഖില് (25), മരുമകള് അഭിരാമി(24), അഭിരാമിയുടെ എട്ടു മാസം പ്രായമായ മകന് റയാന് എന്നിവരാണ് മരിച്ചത്. ഗുരുതരമായി പൊള്ളലേറ്റ പ്രതാപന്റെ മൂത്തമകന് നിഖില് (29) സ്വകാര്യ ആശുപത്രിയില് ചികിത്സയിലാണ്.
