ബംഗളൂരു : കനത്ത ചൂടിൽ വെന്തുരുകിയ ബംഗളൂരു നഗരത്തിന് ആശ്വാസമായി ശക്തമായ വേനൽമഴയും ആലിപ്പഴ വർഷവും. വരും ദിവസങ്ങളിലും മഴ തുടരുമെന്ന കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിന് പിന്നാലെയാണ് നഗരത്തിൽ കനത്ത മഴ പെയ്തത്. ഏകദേശം അര മണിക്കൂറിലധികമായി പെയ്യുന്ന കനത്ത മഴയിൽ നഗരത്തിലെ വിവിധ ഭാഗങ്ങളിൽ വെള്ളക്കെട്ട് ഉണ്ടായി. മഴയ്ക്കൊപ്പം ശക്തമായ മിന്നലും ആലിപ്പഴ വീഴ്ചയും ഉണ്ടായതായാണ് റിപ്പോർട്ടുകൾ. റോഡുകളിൽ വെള്ളം ഉയർന്നതോടെ നഗരത്തിലെ വാഹന ഗതാഗതം സാരമായി തടസ്സപ്പെട്ടു.
വടക്കൻ സംസ്ഥാനങ്ങളിൽ താപനില 45 ഡിഗ്രി സെൽഷ്യസിന് മുകളിലേക്ക് ഉയർന്ന സാഹചര്യത്തിലാണ് ബംഗളൂരുവിൽ ഈ വേനൽമഴ ആശ്വാസമാകുന്നത്. വരും മൂന്ന് ദിവസം കൂടി ശക്തമായ വേനൽമഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകിയിട്ടുണ്ട്. കനത്ത ചൂടിന് താൽക്കാലിക ശമനമായെങ്കിലും പെട്ടെന്നുണ്ടായ മഴയും വെള്ളക്കെട്ടും നഗരജീവിതത്തെ ചെറിയ രീതിയിൽ ബാധിച്ചിട്ടുണ്ട്.
