ചവറ : വീട്ടിനുള്ളിൽ ഭർത്താവിനെ മരിച്ചനിലയിലും ഭാര്യയെ അവശനിലയിലും കണ്ടെത്തി. മുകുന്ദപുരം വട്ടത്തറ കൊടുവിളയിൽവീട്ടിൽ ബിജുവിനെയാണ് (46) മരിച്ചനിലയിൽ കണ്ടത്. കിടപ്പുമുറിയിൽ അവശനിലയിൽ കണ്ട ഭാര്യ ഷീബ കരുനാഗപ്പള്ളിയിലെ സ്വകാര്യ ആശുപത്രിയിൽ ചികിത്സയിലാണ്. സ്വകാര്യ കമ്പനി ജീവനക്കാരാണ് രണ്ടുപേരും.
പോലീസ് പറയുന്നത് ബിജുവിന്റെ ആദ്യവിവാഹവും ഷീബയുടെ രണ്ടാംവിവാഹവുമായിരുന്നു. ഇവർ ഇടയ്ക്ക് പിണക്കത്തിലായിരുന്നെങ്കിലും പിന്നീട് ഒരുമിച്ചു കഴിയുകയായിരുന്നു. കുറച്ചുദിവസമായി സ്വന്തം വീട്ടിലായിരുന്ന ഷീബ ശനിയാഴ്ച രാവിലെയാണ് ഭർത്തൃവീട്ടിലെത്തിയത്. ഷീബയുടെ ഫോണിൽ ബന്ധപ്പെടാൻ ശ്രമിച്ചിട്ട് കിട്ടാത്തതിനെത്തുടർന്ന് ബന്ധുക്കൾ ചവറ പോലീസിൽ അറിയിച്ചു. പോലീസെത്തി കതകുതുറന്ന് നോക്കിയപ്പോഴാണ് ബിജുവിനെ തൂങ്ങിയനിലയിലും ഷീബയെ അവശനിലയിലും കണ്ടത്.