കൊച്ചി : വൈറ്റില ഹബ്ബിനു സമീപം ഒരാഴ്ചമുമ്പ് വിദേശ മലയാളിയുടെ വീട് കുത്തിത്തുറന്ന് സ്വര്ണാഭരണവും വിദേശ കറന്സിയും വിദേശ വാച്ചുകളും ഉള്പ്പെടെ എട്ടുലക്ഷം രൂപയുടെ കവര്ച്ച നടത്തിയ കേസിലെ പ്രതി പിടിയില്. നെയ്യാറ്റിന്കര മലയന്കീഴ് മേപ്രക്കുഴി വടക്കേതില് വീട്ടില് സുനില് ഗുപ്ത (42) യെയാണ് മരട് പോലീസ് ഇന്സ്പെക്ടര് ജോസഫ് സാജനും സംഘവും പഴനി ബസ് സ്റ്റാന്ഡിനടുത്തുള്ള ലോഡ്ജില്നിന്ന് അറസ്റ്റ് ചെയ്തത്.
വീട്ടുകാര് വൈകീട്ട് മാരാരിക്കുളത്ത് ഉത്സവം കാണാന് പോയ രാത്രിയിലായിരുന്നു മോഷണം. പ്രതി പാലക്കാട്ടുണ്ടെന്ന് മനസ്സിലാക്കിയ പോലീസ് അവിടെയെത്തിയെങ്കിലും ഇയാള് കടന്നുകളഞ്ഞു. തുടര്ന്ന് പഴനിയിലെത്തി ലോഡ്ജ് റെയ്ഡ് ചെയ്താണ് പ്രതിയെ പിടിച്ചത്. ഒന്നാം നിലയില് നിന്ന് ചാടി ഓടിയ പ്രതിയെ പിന്തുടര്ന്ന് പിടിക്കുകയായിരുന്നു.
