മൂന്നാര്: മൂന്നാറില് മലമുകളില് നിന്ന് കൂറ്റന് പാറ ഉരുണ്ടുവന്ന് ഓടിക്കൊണ്ടിരുന്ന കാറില് ഇടിച്ച് ഒരാള്ക്ക് പരിക്ക്. കുറ്റന് പാറ കാറിന്റെ ഡ്രൈവര് സീറ്റിനോട് ചേര്ന്ന് ഇടിച്ച് ഡ്രൈവറിന്റെ കാലിനാണ് പരിക്കേറ്റത്. സൂര്യനെല്ലി സ്വദേശി അന്തോണി രാജിനാണ് ആണ് പരിക്കേറ്റത്. പരിക്കേറ്റ ഇയാളെ മൂന്നാര് ടാറ്റ ഹൈറെഞ്ച് ആശുപത്രിയില് പ്രവേശിപ്പിച്ചു. മൂന്നാര് അന്തര് സംസ്ഥാനപാതയില് പെരിയവര റോഡിലാണ് സംഭവം.
മൂന്നാര് ഉതുമല്പ്പെട്ട അന്തര് സംസ്ഥാന പാതയില് പെരിവാര റോഡില് മലമുകളില് നിന്ന് അടര്ന്നുവന്ന പാറ വാഹനത്തിന്റെ ഒരു വശത്തടിക്കുകയായിരുന്നു. തലനാരിഴക്കാണ് വലിയ അപകടം ഒഴിവായത്. മലമുകളില് നിന്ന് അടര്ന്നുവന്ന പാറ റോഡിന് മുകളിലുള്ള മണ്തിട്ടയില് പതിച്ച് രണ്ടായി പിളര്ന്നു. ഇതില് ഒരു ഭാഗമാണ് കാറിന്റെ ഡ്രൈവിങ് സീറ്റിനടുത്തുള്ള ഭാഗത്ത് ഇടിച്ചത്. വാഹനത്തില് ഇടിച്ച ശേഷം പാറ പെരിയവാര പുഴയില് പതിച്ചു. ഇടിയുടെ ആഘാതത്തില് വാഹനം റോഡില് നിന്ന് തെന്നിമാറി പെരിവാരാ പുഴയ്ക്ക് സമീപമുള്ള മണ് തിട്ടയില് തട്ടി നില്ക്കുകയായിരുന്നു. സഞ്ചാരികളെ രാജമലയില് ഇറക്കിവിട്ട ശേഷം വസ്ത്രം എടുക്കാനായി മൂന്നാര് ടൗണിലേക്ക് എത്തുന്ന വഴിക്കായിരുന്നു വാഹനം അപകടത്തില്പ്പെട്ടത്.
