പത്തനംതിട്ട: ആറന്മുള ഇലന്തൂരിൽ നടന്ന നരബലി മനുഷ്യ മനസ്സാക്ഷിയെ ഞെട്ടിക്കുന്നതാണെന്നും സംഭവത്തിൽ വിപുലമായ അന്വേഷണം വേണമെന്നും എസ്ഡിപിഐ ജില്ലാ പ്രസിഡൻ്റ് എസ് മുഹമ്മദ് അനീഷ്. ധനസമ്പാദനത്തിനായി മനുഷ്യർ എത്രഹീനമായ പ്രവർത്തികളും ചെയ്യുന്നത് ആശങ്കാജനകമാണ്. രണ്ട് സ്ത്രീകളെ ദുർമന്ത്രവാദം നടത്തി കൊലപ്പെടുത്തിയത് ഒറ്റപ്പെട്ട സംഭവമായി കാണാതെ വിപുലമായ അന്വേഷണത്തിലൂടെ മുഴുവൻ കണ്ണികളെയും നിയമത്തിന് മുന്നിൽ കൊണ്ടുവരണം. കേരളത്തിൻ്റെ ക്രമസമാധാനം തകർന്നുവെന്നതിൻ്റെ ഒടുവിലെത്തെ ഉദാഹരണമാണ് ഈ സംഭവങ്ങൾ. ഏറെ നാൾ വനിതകളെ കാണാതായിട്ടും ഇത്രയും ഹീനമായ കൊലപാതകങ്ങൾ നടന്നിട്ടും ഇൻ്റലിജൻസ് സംവിധാനങ്ങൾ അറിയാതെ പോയത് ഗൗരവകരമാണ്. പോലീസ് സംവിധാനം അനാസ്ഥ വെടിഞ്ഞ് ഉണർന്ന് പ്രവർത്തിക്കണമെന്നും അദ്ദേഹം ആവശ്യപ്പെട്ടു.
