ഡല്‍ഹി : ഇന്ത്യയില്‍ പ്രതിദിനം റിപ്പോര്‍ട്ട് ചെയ്യപ്പെട്ട കൊവിഡ് കേസുകളില്‍ റെക്കോര്‍ഡ് വര്‍ധന. രാജ്യത്ത് കഴിഞ്ഞ 24 മണിക്കൂറിനുള്ളില്‍ 5242 പുതിയ കൊവിഡ് കേസുകളാണ് റിപ്പോര്‍ട്ട് ചെയ്തത്. ഇതോടെ കൊവിഡ് സ്ഥിരീകരിച്ചവരുടെ എണ്ണം 96,169 ആയതായി കേന്ദ്ര ആരോഗ്യ കുടുംബക്ഷേമ മന്ത്രാലയം അറിയിച്ചു. റിപ്പോര്‍ട്ട് ചെയ്യപ്പെടുന്ന കൊവിഡ് മരണത്തിലും ക്രമാതീതമായ വര്‍ധനവാണുണ്ടായത്. 24 മണിക്കൂറിനുള്ളില്‍ 157 മരണങ്ങളാണ് റിപ്പോര്‍ട്ട് ചെയ്തത്. ഇതോടെ രാജ്യത്ത് കൊവിഡ് ബാധിച്ച്‌ മരിച്ചവരുടെ എണ്ണം 3029 ആയി ഉയര്‍ന്നു. രാജ്യത്ത് 36,824 പേര്‍ രോഗമുക്തി നേടിയെന്ന് കേന്ദ്ര ആരോഗ്യമന്ത്രാലയം അവകാശപ്പെടുന്നു. നിലവില്‍ 56,316 പേര്‍ ചികിത്സയിലുണ്ട്.
ഏറ്റവും കൂടുതല്‍ കൊവിഡ് കേസുകളുള്ള മഹാരാഷ്ട്രയില്‍ വൈറസ് ബാധിതരുടെ എണ്ണം 33,053 ആയി ഉയര്‍ന്നു. കഴിഞ്ഞ 24 മണിക്കൂറിനുള്ളില്‍ 2347 പേര്‍ക്കാണ് വൈറസ് ബാധ സ്ഥിരീകരിച്ചത്. ഞായറാഴ്ച 63 പേര്‍ കൂടി മരിച്ചതോടെ മരണസംഖ്യ 1198 ആയി ഉയര്‍ന്നു. ഗുജറാത്തില്‍ ഞായറാഴ്ച 34 പേരാണ് മരിച്ചത്. ഇതോടെ സംസ്ഥാനത്തെ മരണസംഖ്യ 659 ആയി. ഇതുവരെ 11379 പേര്‍ക്കാണ് കൊവിഡ് സ്ഥിരീകരിച്ചിട്ടുള്ളത്. ഇതുവരെ 4499 പേര്‍ക്ക് അസുഖം ഭേദമായി. ഡല്‍ഹിയില്‍ കഴിഞ്ഞ ദിവസം 31 കൊവിഡ് മരണങ്ങളാണ് റിപ്പോര്‍ട്ട് ചെയ്തത്. ഇതോടെ മരണസംഖ്യ 160 ആയി. കൊവിഡ് ബാധിതരുടെ എണ്ണം 10,054 ആയി ഉയര്‍ന്നു. 4485 പേര്‍ രോഗമുക്തി നേടി. തമിഴ്നാട്ടിലെ കോയമ്പേട് മാര്‍ക്കറ്റില്‍ കൊവിഡ് വ്യാപിച്ചതോടെ വൈറസ് ബാധിതരുടെ എണ്ണം 11,224 ആയി. 78 മരണങ്ങളും റിപ്പോര്‍ട്ട് ചെയ്തു. രാജസ്ഥാനില്‍ 5409 കൊവിഡ് ബാധിതരും 131 മരണവും റിപ്പോര്‍ട്ട് ചെയ്തു. മധ്യപ്രദേശ് 4,977 (248), ഉത്തര്‍പ്രദേശ് 4,259 (104), പശ്ചിമബംഗാള്‍ 2,677 (238) എന്നിങ്ങനെയാണ് കണക്കുകള്‍. കേരളത്തില്‍ കഴിഞ്ഞ ദിവസം 14 പേര്‍ക്കാണ് കൊവിഡ് സ്ഥിരീകരിച്ചത്. നിലവില്‍ 100 ഓളം പേര്‍ ചികിത്സയിലുണ്ട്.
