ബംഗ്ലാദേശ് : ബംഗ്ലാദേശിലെ ചിറ്റഗോങ്ങിൽ ഇന്ത്യൻ ഹൈക്കമ്മീഷൻ ഉദ്യോഗസ്ഥനെ മിഷൻ വളപ്പിനുള്ളിൽ മരിച്ച നിലയിൽ കണ്ടെത്തി. ഇന്ത്യൻ മിഷനിൽ അസിസ്റ്റന്റ് പ്രോട്ടോക്കോൾ ഓഫീസറായി സേവനമനുഷ്ഠിച്ചിരുന്ന നരേന്ദർ (38) ആണ് മരിച്ചത്. മിഷനിലെ ഡാറ്റ എൻട്രി മുറിയുടെ ശുചിമുറിക്ക് മുന്നിലായാണ് ഇദ്ദേഹത്തിന്റെ മൃതദേഹം കണ്ടെത്തിയത്. മുറിക്കുള്ളിൽ നിന്ന് പ്രതികരണമൊന്നും ലഭിക്കാത്തതിനെ തുടർന്ന് നടത്തിയ പരിശോധനയിലാണ് അദ്ദേഹത്തെ മരിച്ച നിലയിൽ കണ്ടെത്തിയത്.
പ്രാഥമിക ഇൻക്വസ്റ്റ് നടപടികളിൽ അസ്വാഭാവികതയൊന്നും കണ്ടെത്തിയിട്ടില്ലെങ്കിലും സംഭവത്തിൽ അസ്വാഭാവിക മരണത്തിന് കേസെടുത്ത് അന്വേഷണം നടത്താനാണ് ബംഗ്ലാദേശ് പോലീസിന്റെ തീരുമാനം. പോസ്റ്റ്മോർട്ടം നടപടികൾക്കായി മൃതദേഹം മെഡിക്കൽ കോളേജ് ആശുപത്രിയിലേക്ക് മാറ്റിയിരിക്കുകയാണ്. നരേന്ദറിന്റെ കുടുംബവുമായി ബന്ധപ്പെടുന്നതിനുള്ള നടപടികൾ ആരംഭിച്ചതായി അധികൃതർ വ്യക്തമാക്കി.
