വാഷിങ്ടണ്: ഖാസിം സുലൈമാനിയുടെ വധത്തിന് പ്രതികാരമായി ഇറാന് നടത്തിയ മിസൈല് ആക്രമണത്തില് യുഎസ് സൈനികര്ക്ക് പരിക്കേറ്റതായി യുഎസ് പ്രതിരോധ വകുപ്പ് സ്ഥിരീകരിച്ചു. ജനുവരി എട്ടിനാണ് ഇറാഖിലെ രണ്ട് യുഎസ് വ്യോമത്താവളങ്ങള്ക്ക് നേരെ ഇറാന് മിസൈല് ആക്രമണം നടത്തിയത്. ആക്രമണത്തില് 11 ട്രൂപ്പുകളിലെ സൈനികര്ക്ക് പരിക്കേറ്റതായാണ് യുഎസ് ഇപ്പോള് പറയുന്നത്. ഇവരെ ചികിത്സയ്ക്കായി കുവൈറ്റിലെയും ജര്മനിയിലെയും ആശുപത്രികളിലേക്ക് മാറ്റിയതായാണ് റിപ്പോര്ട്ട്.
ജനുവരി എട്ടിന് 11 ഇറാനിയന് മിസൈലുകളാണ് യുഎസ് വ്യോമത്താവളങ്ങളില് പതിച്ചതെന്ന് യുഎസ് പ്രസിഡന്റ് ഡോണള്ഡ് ട്രംപും മുതിര്ന്ന സൈനിക ഓഫീസര്മാരും സ്ഥിരീകരിച്ചിട്ടുണ്ട്. ആക്രമണത്തില് 80 യുഎസ് സൈനികര് മരിച്ചതായി ഇറാന് അവകാശപ്പെട്ടിരുന്നു. എന്നാല് ആരും മരിച്ചിട്ടില്ലെന്നും ആര്ക്കും പരിക്കേറ്റിട്ടില്ലെന്നുമാണ് യുഎസ് വ്യക്തമാക്കിയത്.
ഏതാനും സൈനികര് പരിക്കേറ്റ് ചികിത്സയിലാണെന്നാണ് കഴിഞ്ഞ ദിവസം ന്യൂയോര്ക്ക് ടൈംസ് റിപ്പോര്ട്ട് ചെയ്തത്. ഇറാന് ആക്രമണത്തില് ആരും കൊല്ലപ്പെട്ടിട്ടില്ലെന്നും എന്നാല് ചില സൈനികര്ക്ക് തലയ്ക്ക് ഉള്പ്പെടെ പരിക്കേറ്റിട്ടുണ്ടെന്നും യുഎസ് സെന്ട്രല് കമാന്ഡ് വക്താവ് ക്യാപ്റ്റന് ബില് അര്ബര് പ്രസ്താവനയില് പറഞ്ഞു. പരിക്കേറ്റവര് കുവൈറ്റിലും ജര്മനിയിലും ചികിത്സയിലാണെന്നും ഇവര് വൈകാതെ ആരോഗ്യം വീണ്ടെടുത്ത് ഇറാഖിലേക്ക് തിരിച്ചെത്തുമെന്നും ബില് അര്ബര് പറഞ്ഞു.
ജനുവരി മൂന്നിനാണ് ഇറാഖ് തലസ്ഥാനമായ ബാഗ്ദാദ് വിമാനത്താവള റോഡില് യുഎസ് ഡ്രോണ് ആക്രമണത്തില് ഇറാന് റവല്യൂഷണറി ഗാര്ഡ്സ് കമാന്ഡര് ഖാസിം സുലൈമാനി കൊല്ലപ്പെട്ടത്. ഇതോടെയാണ് ഇറാന്-യുഎസ് സംഘര്ഷം കൂടുതല് രൂക്ഷമായത്. എന്നാല് ഇറാന്റെ മിസൈല് ആക്രമണത്തിന് ശേഷം തിരിച്ചടിക്കില്ലെന്ന് യുഎസ് പ്രസിഡന്റ് ഡോണള്ഡ് ട്രംപ് പ്രഖ്യാപിക്കുകയായിരുന്നു. അതേസമയം ഇറാഖിലെ സൈനിക വിന്യാസം അമേരിക്ക ശക്തിപ്പെടുത്തിയിട്ടുണ്ട്. പ്രതികാരാഹ്വാനത്തില് നിന്ന് ഇറാനും പിന്നോട്ട് പോയിട്ടില്ല.
