കണ്ണൂര്: ഇരിക്കൂര് സീറ്റിനെ ചൊല്ലി കണ്ണൂരിലെ കോണ്ഗ്രസിനുള്ളില് തുടങ്ങിയ പൊരിഞ്ഞ ഗ്രൂപ്പ് പോരിന് അറുതി. രണ്ടാഴ്ച നീണ്ട പരസ്പര വിഴുപ്പലക്കല് നിര്ത്തി മഞ്ഞുരുക്കത്തിന് സ്ഥാനാര്ഥി സജീവ് ജോസഫിന്റെ തെരഞ്ഞെടുപ്പ് കണ്വെന്ഷന് വേദിയായി. ശ്രീകണ്ഠപുരത്ത് നടന്ന കണ്വന്ഷനില് സോണി സെബാസ്റ്റ്യന് ഒഴികെയുള്ള എ ഗ്രൂപ്പ് നേതാക്കള് മിക്കവരും പങ്കെടുത്തു. വ്യക്തിപരമായ പ്രശ്നം കാരണമാണ് കണ്വെന്ഷനില് പങ്കെടുക്കാതിരുന്നതെന്ന് സോണി സെബാസ്റ്റ്യന് അറിയിച്ചു. ഒരുവിഭാഗം എ ഗ്രൂപ്പ് നേതാക്കളും പങ്കെടുത്തിട്ടില്ല.
സ്ഥാനാര്ഥി നിര്ണയം മുതല് എതിര്പ്പുമായി തെരുവിലിറങ്ങിയ എ ഗ്രൂപ്പ് നേതാക്കള് ഉമ്മന് ചാണ്ടിയുടെ ഇടപെടലിനെ തുടര്ന്നാണ് പിന്മാറിയത്. തങ്ങള്ക്ക് അര്ഹതപ്പെട്ട സീറ്റ് തട്ടിയെടുത്തുവെന്നാരോപിച്ച് യു.ഡി.എഫ് ജില്ലാ ചെയര്മാന് അടക്കമുള്ള നേതാക്കള് കൂട്ടരാജി പ്രഖ്യാപിച്ചിരുന്നു. ഒത്തുതീര്പ്പിലെത്തിയതോടെ രാജി തീരുമാനം പിന്വലിച്ചു. ഡി.സി.സി പ്രസിഡന്റ് സ്ഥാനം ഉള്പ്പെടെ എ ഗ്രൂപ്പിനു നല്കാമെന്ന് ഉമ്മന് ചാണ്ടി നേതാക്കളെ അറിയിച്ചിരുന്നു. സോണി സെബാസ്റ്റ്യന് രാജ്യസഭ സീറ്റ് നല്കാനും ധാരണയായതായി സൂചനയുണ്ട്.
വിയോജിപ്പുകള് സ്വാഭാവികമാണെന്നും ഒറ്റക്കെട്ടായി തെരഞ്ഞെടുപ്പിനെ നേരിടുമെന്നും നേതാക്കള് പറഞ്ഞു. വിഭാഗീയത അടഞ്ഞ അധ്യായമാണെന്ന് കെ.സി. ജോസഫ് എം.എല്.എ പറഞ്ഞു. അതേസമയം, പ്രശ്ന പരിഹാരം ആയിട്ടില്ലെന്നും രണ്ടുദിവസത്തിനകം പരിഹാരമാകുമെന്നും കെ. സുധാകരന് എം.പി വ്യക്തമാക്കി.
