പത്തനംതിട്ട : വഴിയരികിൽ ഭക്ഷണവും വെള്ളവും ലഭിക്കാതെ അവശനായി കിടന്ന വയോധികന് കോയിപ്രം ജനമൈത്രി പോലീസ് രക്ഷകരായി. ഇന്ന് രാവിലെ 11 മണിയോടെ തൊട്ടപ്പുഴശ്ശേരി ഐ എൻ എസ് ജംഗ്ഷനിൽ റോഡരികിൽ പൊടിമോൻ (72) എന്നയാൾ കിടക്കുന്നത് ശ്രദ്ധയിൽപ്പെട്ട പഞ്ചായത്ത് അംഗം അനിത കോയിപ്രം ജനമൈത്രി പോലീസിനെ വിവരം അറിയിച്ചു.
എസ് ഐ അനൂപിന്റെ നിർദേശ പ്രകാരം ബീറ്റ് ഓഫീസർ വി പി പരശ്ശൂറാം, വോളന്റിയർ ജിഷ്ണുവുമൊത്ത് സ്ഥലത്തെത്തി വയോധികന് ഭക്ഷണം ലഭ്യമാകുകയും തുടർന്ന് കോയിപ്രം പ്രാഥമിക ആരോഗ്യ കേന്ദ്രത്തിൽ എത്തിക്കുകയും ചെയ്തു. അവിടെ പ്രാഥമിക ശുശ്രൂഷ ലഭ്യമാക്കുകയും കിടങ്ങന്നൂർ കരുണാലയം അധികൃതരെ വിവരം അറിയിക്കുകയുമായിരുന്നു. വൃദ്ധനെ ഏറ്റെടുക്കാൻ സന്നദ്ധത അറിയിച്ച അധികൃതർ ഉച്ചയ്ക്ക് സ്ഥലത്തെത്തി കരുണാലയം കേന്ദ്രത്തിലേക്ക് കൊണ്ടുപോയി.
