കരുനാഗപ്പള്ളി: കഴിഞ്ഞ ദിവസം ആന്ധ്ര സ്വദേശിക്ക് കോവിഡ് സ്ഥിരീകരിച്ചതോടെ കരുനാഗപ്പള്ളി നഗരസഭയിലെ ഏഴ് ഡിവിഷനുകളില് നിരോധനാജ്ഞ പ്രഖ്യാപിച്ചു. കരുനാഗപ്പള്ളി ടൗണ്, കെ. എസ് .ആര് .ടി. സി, എസ് .കെ. വി , കന്നേറ്റി, ടി .ടി .ഐ, അയണിവേലി മേഖലകളിലാണ് നിരോധനാജ്ഞ പുറപ്പെടുവിച്ചിരിക്കുന്നത്. നഗരസഭയുടെ നേതൃത്വത്തില് ഗേള്സ് ഹൈസ്ക്കൂളില് പ്രവര്ത്തിച്ചു വന്ന സാമൂഹ്യ അടുക്കളയും പൂട്ടി.
കഴിഞ്ഞ 22 ന് മത്സ്യം നിറച്ച കണ്ടയ്നറുമായെത്തിയ 28 വയസുകാരനായ ആന്ധ്രാ സ്വദേശിക്കാണ് രോഗം സ്ഥിരീകരിച്ചത്. ഓച്ചിറയിലെ സത്രത്തില് നിരീക്ഷണത്തില് കഴിഞ്ഞു വന്ന ഇയാളെ പരിശോധനാ ഫലം പോസിറ്റീവായതോടെ പാരിപ്പള്ളി മെഡിക്കല് കോളേജിലേക്ക് മാറ്റിയിരുന്നു. കരുനാഗപ്പള്ളി ഹൈസ്ക്കൂള് ജംഗ്ഷനില് പിടിയിലായതിനു ശേഷം ഇയാളുമായി നേരിട്ടു ബന്ധപ്പെട്ട 35 ഓളം പേരുടെ സമ്പര്ക്ക പട്ടിക ആരോഗ്യ വകുപ്പ് തയ്യാറാക്കിയിരുന്നു.
കൂടുതല് പേര് ഇയാളുടെ സമ്പര്ക്ക പട്ടികയില് ഉണ്ടാകുമെന്നാണറിയുന്നത്. ഇന്നലെ വൈകിട്ട് വരെ 35 ഓളം പേരുടെ സ്രവ പരിശോധന കരുനാഗപ്പള്ളി താലൂക്കാശുപത്രിയില് പൂര്ത്തിയായി. ഇതില് 14 പേരെ വിവിധ കേന്ദ്രങ്ങളിലായി ക്വാറന്റീനിലാക്കി. ബാക്കിയുള്ളവരെ വീടുകളിലുംനിരീക്ഷണത്തിലാക്കിയിരിക്കുകയാണ്. ഭക്ഷ്യ സുരക്ഷാ ജീവനക്കാര്, നഗരസഭാ ജീവനക്കാര്, ആരോഗ്യ വിഭാഗം, പോലീസ്, ചായക്കടയിലെ രണ്ട് പേര്, എന്നിവര് രോഗിയുമായി നേരിട്ടു ബന്ധപ്പെട്ടവരാണ്. ഇവരെയാണ് ആദ്യഘട്ടത്തില് പരിശോധനയ്ക്ക് വിധേയമാക്കുന്നത്.
The post ആന്ധ്ര സ്വദേശിക്ക് കോവിഡ് : കരുനാഗപ്പള്ളി നഗരസഭയിലെ ഏഴ് ഡിവിഷനുകളില് നിരോധനാജ്ഞ appeared first on Pathanamthitta Media.
