കാസര്ഗോഡ് : ജില്ലയിലെ ഒരേ സ്കൂളിലെ ഏഴ് വിദ്യാര്ഥികളെ പീഡിപ്പിച്ച കേസില് രണ്ടുപേര് അറസ്റ്റില്. പെരിയ ഏച്ചിലടുക്കം അരങ്ങിലടുക്കത്ത് മാധവന്, മണി എന്നിവരെയാണ് പോലീസ് അറസ്റ്റ് ചെയ്തത്. പീഡിപ്പിക്കപ്പെട്ട മൂന്ന് പെണ്കുട്ടികളുടെ പരാതിയുടെ അടിസ്ഥാനത്തിലാണ് ഇരുവരെയും പിടികൂടിയത്. ഇവരുള്പ്പടെ ഒരാള്ക്കെതിരെ കൂടി പോക്സോ കേസുകള് രജിസ്റ്റര് ചെയ്തിട്ടുണ്ട്. ഇയാള്ക്കായി പോലീസ് അന്വേഷണം ഊര്ജിതമാക്കി.
അയല്വാസികളും അകന്ന ബന്ധത്തില് പെട്ടവരുമാണ് പീഡിപ്പിച്ചതെന്നാണ് പെണ്കുട്ടികള് നല്കിയ മൊഴി. ബേക്കല് പോലീസ് സ്റ്റേഷന് പരിധിയില് ഏഴ് വിദ്യാര്ഥികളാണ് പീഡനം നേരിട്ടതായി വെളിപ്പെടുത്തിയത്. സ്കൂളില് നടത്തിയ കൗണ്സിലിംഗിനിടെയാണ് കുട്ടികള് പീഡന വിവരം വെളിപ്പെടുത്തിയത്. ബേക്കല്, അമ്പലത്തറ സ്റ്റേഷനുകളില് ഏഴ് പോക്സോ കേസുകളാണ് സംഭവവുമായി ബന്ധപ്പെട്ട് രജിസ്റ്റര് ചെയ്തിരിക്കുന്നത്. ചൈല്ഡ്ലൈന് ഇടപെട്ടാണ് പോലീസില് പരാതി നല്കിയത്.
