കോന്നി : കോന്നി വകയാറിൽ സ്കൂട്ടറും കാറും കൂട്ടിയിടിച്ച് സ്കൂട്ടർ യാത്രക്കാരൻ മരിച്ചു. മകളെ ഗുരുതര പരുക്കുകളോടെ പത്തനംതിട്ട ജനറൽ ആശുപത്രിയിൽ പ്രവേശിപ്പിച്ചു. വകയാർ എട്ടാംകുറ്റിയിൽ ഇന്ന് വൈകിട്ട് മൂന്ന് മണിയോടെ ആണ് സംഭവം നടന്നത്. മുറിഞ്ഞകൽ സ്വദേശി സന്ധ്യഭവനത്തിൽ ഭരതൻ (79) ആണ് മരിച്ചത്. കോന്നിയിൽ നിന്നും മുറിഞ്ഞകൽ ഭാഗത്തേക്ക് വന്ന ഭരതനും മകൾ സന്ധ്യയും സഞ്ചരിച്ചിരുന്ന സ്കൂട്ടറിൽ എതിരെ വന്ന പത്തനാപുരം സ്വദേശിയുടെ കാർ ഇടിച്ച് തെറിപ്പിക്കുകയായിരുന്നു.
ഇടിയുടെ ആഘാതത്തിൽ സന്ധ്യ സ്കൂട്ടറിൽ നിന്നും തെറിച്ച് സമീപത്തെ മതിലിന് അപ്പുറത്തേക്ക് വീണു. കാർ സ്കൂട്ടറിൽ ഇടിച്ച ശേഷം താഴ്ചയിലേക്ക് മറിയുകയും ചെയ്തു. സ്കൂട്ടർ പൂർണ്ണമായി തകർന്നു. പത്തനാപുരം സ്വദേശിയായ റിയാസ് ഖാൻ ആണ് കാർ ഓടിച്ചിരുന്നത്. ഇയാൾ ഉറങ്ങിപ്പോയതാണ് അപകടത്തിന് കാരണമെന്ന് കോന്നി പോലീസിന് മൊഴി നൽകി. ഇയാൾക്കെതിരെ മനഃപൂർവമല്ലാത്ത നരഹത്യക്ക് കോന്നി പോലീസ് കേസ് രജിസ്റ്റർ ചെയ്തു. ഭരതന്റെ മൃതദേഹം പത്തനംതിട്ട ജനറൽ ആശുപത്രി മോർച്ചറിയിലേക്ക് മാറ്റി. ഭാര്യ – വിജയമ്മ, മക്കൾ – അനിൽ, സുനിൽ, സന്ധ്യ
