കോന്നി: വാർദ്ധക്യത്തിലിരിക്കുന്നവര്ക്ക് സ്വാന്ത്വനമായി പകൽ വീടൊരുക്കി കോന്നി ബ്ലോക്ക് പഞ്ചായത്ത് മാതൃകയായി. 2018 -19 വർഷത്തെ ബജറ്റിൽ തുക വകയിരുത്തിയാണ് പകൽവീട് നിർമ്മിച്ചത്.
മക്കൾ ജോലിക്ക് പോകുമ്പോൾ പകൽ സമയങ്ങളിൽ വീടുകളിൽ ഒറ്റപ്പെട്ട് കഴിയുന്ന വൃദ്ധ മാതാപിതാക്കളുടെ മാനസിക സംഘർഷം അകറ്റുകയും വൃദ്ധജനങ്ങളെ പരിപാലിക്കുകയും ചെയ്യുക എന്ന ലക്ഷ്യത്തോടെയാണ് പകൽ വീട് നിർമ്മിച്ചിരിക്കുന്നത്. രാവിലെ എട്ട് മുതൽ വൈകിട്ട് അഞ്ച് മണി വരെയാണ് പ്രവർത്തനസമയം. വൈകുന്നേരങ്ങളിൽ ഇവരെ തിരികെ വീടുകളിൽ എത്തിക്കുന്നതിനുള്ള വാഹന സൗകര്യവും ബ്ലോക്ക് പഞ്ചായത്ത് ഒരുക്കിയിട്ടുണ്ട്.
ഇരുപത്തിയഞ്ച് പേരെ ഒരേ സമയം ഇവിടെ സംരക്ഷിക്കുവാൻ കഴിയും. പ്രഭാത ഭക്ഷണവും ഉച്ച ഭക്ഷണവും വൈകുന്നേരത്തെ ചായയും ലഘു ഭക്ഷണവുമെല്ലാം ഇവിടെ ക്രമീകരിച്ചിട്ടുണ്ട്. ഇതിന് പുറമേ ഇവരുടെ മാനസികോല്ലാസത്തിനായി പ്രായമായവരെ ഉൾപ്പെടുത്തി കലാ പരിപാടികളും സംഘടിപ്പിക്കും.
പതിനാല് ലക്ഷത്തോളം രൂപ ഭക്ഷണത്തിനും മറ്റ് ചിലവുകൾക്കുമായി മാറ്റി വെച്ചിട്ടുണ്ട്. കോന്നി ബ്ലോക്ക് പഞ്ചായത്ത് പ്രസിഡന്റ് കോന്നിയൂർ പി. കെ പകൽ വീട് ഉത്ഘാടനം നിർവ്വഹിച്ചു. വൈസ് പ്രസിഡന്റ് റോസമ്മ ബാബുജി അദ്ധ്യക്ഷത വഹിച്ചു. പ്രമാടം ഗ്രാമപഞ്ചായത്ത് പ്രസിഡന്റ് റോബിൻ പീറ്റർ, മലയാലപ്പുഴ ഗ്രാമപഞ്ചായത്ത് പ്രസിഡന്റ് കെ ജയലാൽ, വള്ളിക്കോട് പഞ്ചായത്ത് പ്രസിഡന്റ് ലിസിമോൾ ജോസഫ്, ബ്ലോക്ക് പഞ്ചായത്തംഗങ്ങളായ കെ വിശ്വംഭരൻ, പി.ആർ രാമചന്ദ്രൻ പിള്ള, മാത്യൂ തോമസ്, എലിസബത്ത് രാജു, പ്രീയ എസ് തമ്പി, മിനി വിനോദ്, ബി ഡി ഒ ഗ്രേസി സേവ്യർ തുടങ്ങിയവർ പങ്കെടുത്തു.
