കോട്ടയം : ലോക്ക്ഡൗണ്‍ നിര്‍ദ്ദേശങ്ങള്‍ ലംഘിച്ച്‌ കോട്ടയം ജില്ലാ ആശുപത്രിയില്‍ നഴ്സുമാരുടെ അഭിമുഖം. ആയിരത്തിലേറെ പേരാണ് ആശുപത്രി മതില്‍ക്കെട്ടിന് അകത്തും പുറത്തുമായി നിന്നിരുന്നത്. ഇവര്‍ സാമൂഹിക അകലം പോലും പാലിച്ചിരുന്നില്ല. റോഡിലേക്ക് ക്യൂ നീണ്ടതോടെ സ്ഥലത്ത് ആംബുലന്‍സുകള്‍ക്ക് പോലും കടന്നുപോകാന്‍ സാധിക്കാത്ത നിലയായി. സംഭവമറിഞ്ഞ് പോലീസ് സ്ഥലത്തെത്തിയെങ്കിലും ഗതാഗതം നിയന്ത്രിക്കാനാണ് മുന്‍ഗണന നല്‍കിയത്. കോട്ടയത്തെ കൊവിഡ് ആശുപത്രിയാണ് ജില്ലാ ആശുപത്രി. ഇവിടെ ഇപ്പോള്‍ രോഗികളില്ലെന്നാണ് വിവരം.
ആശുപത്രിയില്‍ ഒരു മാസത്തെ താത്കാലിക ഒഴിവിലേക്കാണ് അഭിമുഖം നടത്തിയത്. 21 ഒഴിവുകളാണ് ഉണ്ടായിരുന്നത്. നേരത്തെ നിശ്ചയിച്ച അഭിമുഖമായിരുന്നു. ഇത്രയധികം പേര്‍ വരുമെന്ന് കരുതിയിരുന്നില്ലെന്ന് ജില്ലാ മെഡിക്കല്‍ ഓഫീസര്‍ ജേക്കബ് വര്‍ഗീസ് പറഞ്ഞു. ആളുകളെ എങ്ങനെ നിയന്ത്രിക്കുമെന്ന് പോലീസിനും ആശയക്കുഴപ്പമുണ്ടായി. രാവിലെ വിളിച്ച്‌ അഭിമുഖം ഉണ്ടെന്ന് അറിയിച്ചിരുന്നു എങ്കിലും ഇത്രയധികം ആളുകള്‍ എത്തുമെന്ന് പോലീസും കരുതിയിരുന്നില്ല. അതുകൊണ്ട് തന്നെ കുറച്ച്‌ പോലീസുകാരെ മാത്രമേ ഡ്യൂട്ടിക്ക് നിയമിച്ചുണ്ടായിരുന്നുള്ളുവെന്ന് കോട്ടയം ഡിവൈഎസ്പി ശ്രീകുമാര്‍ മാധ്യമങ്ങളോട് പറഞ്ഞു. ഇതേ തുടര്‍ന്ന് അഭിമുഖം മറ്റൊരു ദിവസത്തിലേക്ക് മാറ്റിവച്ചുവെന്നും ആശുപത്രി അധികൃതര്‍ പൊലീസിനെ അറിയിച്ചു.
