കൊച്ചി: കെഎസ്ആര്ടിസി ബസ് സ്റ്റേഷനുകളിലെ ശുചിമുറികളുടെ അവസ്ഥ ഭയാനകമാണെന്നും സൗകര്യങ്ങള് മെച്ചപ്പെടുത്തണമെന്നും ഹൈക്കോടതി. യാത്രക്കാര്ക്ക് ഭയപ്പാടോടു കൂടി മാത്രമേ ശുചിമുറികളിലേക്ക് പോകാനാകൂ. ബസ് സ്റ്റേഷനുകളിലെ അടിസ്ഥാന സൗകര്യങ്ങള് മെച്ചപ്പെടുത്തിയാല് കൂടുതല് യാത്രക്കാര് കെഎസ്ആര്ടിസിയിലേക്കെത്തും. ഇതോടെ വരുമാനം വര്ധിപ്പിക്കാന് സാധിക്കുമെന്നും ഹൈക്കോടതി വിലയിരുത്തി.
ജീവനക്കാര്ക്ക് എല്ലാ മാസവും അഞ്ചാം തീയതിക്കകം ശമ്പളം നല്കുന്നതിനായി എന്തു ചെയ്യാനാകുമെന്നു റിപ്പോര്ട്ട് സമര്പ്പിക്കാന് ഹൈക്കോടതി സര്ക്കാരിനു നിര്ദ്ദേശം നല്കി. മുഖ്യമന്ത്രിയുടെ നേതൃത്വത്തില് ഉന്നതതല യോഗം ചേര്ന്ന് ഈ മാസം 31നകം റിപ്പോര്ട്ട് സമര്പ്പിക്കാനാണ് കോടതിയുടെ നിര്ദ്ദേശം. ശമ്പള വിതരണത്തിന് മുന്ഗണന നല്കണമെന്ന ജീവനക്കാരുടെ ഹര്ജി ഓഗസ്റ്റ് 2ന് ഹൈക്കോടതി വീണ്ടും പരിഗണിക്കും.