തിരുവനന്തപുരം : തമിഴ്നാട് സര്ക്കാറില്നിന്നുള്ള അനുമതി ലഭിച്ചതിനെ തുടര്ന്ന് ഇന്ന് മുതല് കെ.എസ്.ആര്.ടി.സി തമിഴ്നാട്ടിലേക്ക് സര്വിസുകള് ആരംഭിക്കും. കോവിഡ് വ്യാപനസമയത്ത് അന്തര് സംസ്ഥാന സര്വിസുകള് നിര്ത്തിവെച്ചിരുന്നു. കര്ണാടകത്തിലേക്കുള്ള സര്വിസുകള്ക്ക് അനുമതി ലഭിച്ചെങ്കിലും തമിഴ്നാട് അനുമതി നല്കിയിരുന്നില്ല. തുടര്ന്ന് മുഖ്യമന്ത്രി പിണറായി വിജയന് തമിഴ്നാട് മുഖ്യമന്ത്രിക്ക് കത്തയച്ചിരുന്നു. ശബരിമല തീര്ഥാടനത്തോടനുബന്ധിച്ചും സാധാരണക്കാരുടെ യാത്രാബുദ്ധിമുട്ടുകള് പരിഗണിച്ചും സര്വിസുകള് പുനരാരംഭിക്കാനുള്ള സാഹചര്യം ഒരുക്കണമെന്ന കേരളത്തിന്റെ ആവശ്യം പരിഗണിച്ചാണ് തമിഴ്നാട് നിയന്ത്രണം പിന്വലിച്ചത്. ഡിസംബര് ആറിന് ഗതാഗതമന്ത്രി ആന്റണി രാജു തമിഴ്നാട് ഗതാഗത മന്ത്രിയോട് ചര്ച്ച നടത്താനിരിക്കെയാണ് തമിഴ്നാട് അനുമതി നല്കിയത്.
ബുധനാഴ്ച മുതല് കോയമ്പത്തൂര് – പാലക്കാട് റൂട്ടിലെ ചെയിന് സര്വിസ് ഉള്പ്പെടെ വിവിധ അന്തര് സംസ്ഥാന ബസ് സര്വിസുകള് പുനരാരംഭിക്കും. ദീര്ഘദൂര കെ.എസ്.ആര്.ടി.സി, സ്വകാര്യ ഓമ്നി ബസ് സര്വിസുകളും തുടങ്ങും. തമിഴ്നാട് കോവിഡ് നിയന്ത്രണങ്ങള് ഇളവുകളോടെ നീട്ടിയിരുന്നു. ഇതേ തുടര്ന്നാണ് അന്തര്സംസ്ഥാന സര്വീസുകള്ക്ക് ഒരു ഇടവ്ളയ്ക്കു ശേഷം വഴിതുറന്നത്. ഇതുവരെ അന്തര് സംസ്ഥാന യാത്രയ്ക്കു വേണ്ടി ട്രെയിന് ഗതാഗതത്തെയായിരുന്നു കേരളത്തിലെ ജനങ്ങള് ആശ്രയിച്ചിരുന്നത്.
