കോഴിക്കോട് : കുടുംബശ്രീ മുഖേന നടപ്പാക്കുന്ന ദീൻ ദയാൽ ഉപാധ്യായ ഗ്രാമീൺ കൗശല്യ യോജന (ഡി.ഡി.യു.ജി.കെ.വൈ.)-2.0 പദ്ധതിയിൽ ഇനി പുതുതലമുറ കോഴ്സുകളും. എ.ഐ. ഡിവലപ്പർ, സൈബർ സെക്യൂരിറ്റി, ഡ്രോൺ ഓപ്പറേറ്റർ തുടങ്ങിയ കോഴ്സുകളിലുൾപ്പെടെ പരിശീലനംനൽകി തൊഴിൽ നൽകുകയാണ് ലക്ഷ്യം. നാലുമാസത്തിനകം സംസ്ഥാനത്ത് 30,272 പേർക്ക് തൊഴിലുറപ്പാക്കും. കേന്ദ്ര, സംസ്ഥാനസർക്കാരുകൾ ചേർന്നാണ് ഗ്രാമീണമേഖലയിലെ യുവജനങ്ങൾക്ക് സൗജന്യ നൈപുണി പരിശീലനം നൽകുന്നത്. രണ്ടാംഘട്ടത്തിന്റെ ആദ്യപടിയായി കഴിഞ്ഞ സാമ്പത്തികവർഷം 1211 പേർക്ക് തൊഴിൽ നൽകി. ശേഷിക്കുന്ന 29061 പേർക്കാണ് ഡിസംബറിനുള്ളിൽ പുതിയ കോഴ്സുകളുൾപ്പെടുത്തി പരിശീലനംനൽകി തൊഴിൽ ലഭ്യമാക്കുക. സംസ്ഥാനത്തെ 56,665 പേർക്ക് ആദ്യഘട്ടത്തിൽ തൊഴിൽ നൽകിയിരുന്നു.
18-നും 35-നും ഇടയിൽ പ്രായമുള്ളവർക്കാണ് സൗജന്യപരിശീലനം. സ്ത്രീകൾ, ഭിന്നശേഷിക്കാർ, പട്ടികവർഗമേഖലയിലുള്ളവർ എന്നിവർക്ക് 45 വയസ്സാണ് പ്രായപരിധി. പത്താംക്ലാസ് മുതലുള്ളവർക്ക് വിദ്യാഭ്യാസ യോഗ്യത, അഭിരുചി എന്നിവയ്ക്കനുസരിച്ച് കോഴ്സ് തിരഞ്ഞെടുക്കാം. പരിശീലനം നൽകുന്ന എംപാനൽഡ് ഏജൻസികളെ സംസ്ഥാന മിഷനാണ് തിരഞ്ഞെടുക്കുന്നത്. 80,000 മുതൽ രണ്ടുലക്ഷം വരെ ചെലവുവരുന്നതാണ് കോഴ്സ്.
