സീതത്തോട് : സംസ്ഥാനത്തെ ഏറ്റവും വലിയ രണ്ടാമത്തെ ജല വൈദ്യുത പദ്ധതിയായ ശബരിഗിരിയിൽ വൈദ്യുതോൽപാദനത്തിനു വെള്ളം എത്തിക്കുന്ന പെൻസ്റ്റോക് പൈപ്പിൽ ചോർച്ച. രണ്ട് ദിവസമായി ചോർച്ച തുടരുന്നു. മൂഴിയാർ പെൻസ്റ്റോക് ക്രോസിങ് ഭാഗത്ത് പൈപ്പുകൾ തമ്മിൽ ബന്ധിച്ചിരിക്കുന്നിടത്തു നിന്നാണ് വെള്ളം പുറത്തേക്കു ഒഴുകുന്നത്.
കാലപ്പഴക്കത്തിൽ സീൽ തകരാറിലായതാണ് ചോർച്ചയ്ക്കു കാരണം. ആദ്യം ചെറിയ തുള്ളിയായിട്ടാണ് വെള്ളം പോയിരുന്നത്. ഇന്നലെ ഉച്ചയോടെ ചോർച്ചയുടെ ശക്തി കൂടി. പദ്ധതിയുടെ പ്രധാന ജല സംഭരണിയായ കക്കി–ആനത്തോട് അണക്കെട്ടിൽ നിന്ന് തുരങ്കത്തിലൂടെ എത്തുന്ന വെള്ളം വാൽവ് ഹൗസിൽ എത്തിയ ശേഷം 3 കൂറ്റൻ പൈപ്പുകളിലൂടെയാണ് പവർഹൗസിൽ എത്തുന്നത്. ഇതിൽ ഒന്നിലാണ് ചോർച്ച കണ്ടെത്തിയിരിക്കുന്നത്.
