ന്യൂഡല്ഹി : പഞ്ചാബിലെ ലൗലി പ്രൊഫഷണല് സര്വകലാശാലയില് ജീവനൊടുക്കിയ മലയാളി വിദ്യാര്ഥിയുടെ ആത്മഹത്യാക്കുറിപ്പ് കണ്ടെത്തി. ചേര്ത്തല പള്ളിപ്പുറം സ്വദേശിയായ അഖിന് എസ്. ദിലീപ്(21) എഴുതിയ കുറിപ്പാണ് ഹോസ്റ്റല് മുറിയില്നിന്ന് കണ്ടെടുത്തത്. മുമ്പ് പഠിച്ച കോഴിക്കോട് എന്.ഐ.ടി.യിലെ അധ്യാപകനെതിരെയാണ് കുറിപ്പില് പറഞ്ഞിരിക്കുന്നത്.
കോഴിക്കോട് എന്.ഐ.ടി.യിലെ പഠനം അവസാനിപ്പിക്കാനിടയായതിന് പ്രൊഫ. പ്രസാദ് കൃഷ്ണയെ കുറ്റപ്പെടുത്തുന്നുവെന്നാണ് കുറിപ്പില് കാണുന്നത്. താനെടുത്ത തീരുമാനത്തില് പശ്ചാത്തപിക്കുന്നുവെന്നും താന് എല്ലാവര്ക്കും ഭാരമാണെന്നും കുറിപ്പില് ഉള്ക്കൊള്ളിച്ചിട്ടുണ്ട്.
ലൗലി പ്രൊഫഷണല് സര്വകലാശാലയിലെ ഒന്നാംവര്ഷ ബി.ഡിസൈന് വിദ്യാര്ഥിയായ അഖിന് നേരത്തെ കോഴിക്കോട് എന്.ഐ.ടി.യിലെ ബി.ടെക്ക് കമ്പ്യൂട്ടര് സയന്സ് വിദ്യാര്ഥിയായിരുന്നു. പരീക്ഷയില് പരാജയപ്പെട്ടത് കാരണം എന്.ഐ.ടി.യിലെ പഠനം തുടരാന് കോഴ്സ് ഡയറക്ടര് അനുവദിച്ചില്ലെന്നാണ് വിവരം. ഇതാണ് ആത്മഹത്യയിലേക്ക് നയിച്ചതെന്നും കരുതുന്നു.ഇതേത്തുടര്ന്ന് ജലന്ധറിലെ ലൗലി പ്രൊഫഷണല് സര്വകലാശാല കാമ്പസില് വലിയ പ്രതിഷേധമാണ്ഉയരുന്നത്. മലയാളി വിദ്യാര്ഥിയുടെ മരണവുമായി ബന്ധപ്പെട്ട് പഞ്ചാബ് പോലീസ് കേസെടുത്ത് അന്വേഷണം ആരംഭിച്ചു.
