ഡല്ഹി: ഐപിഎല് ടീം കൊല്ക്കത്ത നൈറ്റ് റൈഡേഴ്സ് ക്യാപ്റ്റന് നിതീഷ് റാണയുടെ ഭാര്യയെ പടിഞ്ഞാറന് ഡല്ഹിയില് വെച്ച് പിന്തുടര്ന്ന് ഉപദ്രവിച്ചതിന് ഒരാളെ പോലീസ് ശനിയാഴ്ച അറസ്റ്റ് ചെയ്തു. റാണയുടെ ഭാര്യ സാചി മാര്വയെയാണ് രണ്ടു യുവാക്കള് പിന്തുടര്ന്നെത്തി ശല്യം ചെയ്തത്. ഇവരില് ഒരാളാണ് അറസ്റ്റിലായത്.
സാചി സഞ്ചരിച്ച കാറിന്റെ പിറകെ ബൈക്കില് പിന്തുടര്ന്നെത്തിയ ഇവര് കാറിലടിക്കുകയും ചെയ്തു. സംഭവം മൊബൈലില് പകര്ത്തിയ സാചി രണ്ടു യുവാക്കളുടേയും ചിത്രങ്ങള് സഹിതം സാമൂഹിക മാധ്യമങ്ങളില് പോസ്റ്റു ചെയ്തു. അതിനിടെ താന് പോലീസില് വിവരമറിയിച്ചുവെന്നും എന്നാല് പരാതി സ്വീകരിക്കാന് പോലീസ് തയ്യാറായില്ല എന്നും സാക്ഷി ആരോപിച്ചു.
