തിരുവനന്തപുരം : കെഎസ്ഇബി വിവാദത്തില് മന്ത്രി കെ.കൃഷ്ണന്കുട്ടിക്കെതിരെ സിപിഎം സംസ്ഥാന സെക്രട്ടേറിയറ്റ് അംഗം എം.എം മണി പ്രതികരിച്ച സാഹചര്യത്തില് പരസ്യ പിന്തുണയുമായി ജനതാദള് (എസ്) രംഗത്തെത്തി.
മന്ത്രി കെ.കൃഷ്ണന്കുട്ടിയെ ഒറ്റപ്പെടുത്തി ആക്രമിക്കാന് ആര്ക്കും വിട്ടുകൊടുക്കില്ലെന്നു ജനതാദള് (എസ്) സംസ്ഥാന പ്രസിഡന്റ് മാത്യു ടി തോമസ് പറഞ്ഞു. പാര്ട്ടി വേദികളിലല്ലാതെ പാര്ട്ടിയുടെയോ മുന്നണിയുടെയോ മന്ത്രിയെ ഭരണകക്ഷി നേതാക്കള് വിമര്ശിക്കുകയോ ആക്ഷേപിക്കുകയോ ചെയ്യുന്നത് ഇടതുപക്ഷ സംഘടനാ രീതികള്ക്കു യോജിച്ചതല്ല. മുഖ്യമന്ത്രിയും മുന്നണി നേതാക്കളും ഈ വിഷയത്തില് ഇടപെടണമെന്നു മാത്യു ടി തോമസ് ആവശ്യപ്പെട്ടു.
ഘടകകക്ഷിക്കു വൈദ്യുതി വകുപ്പ് നല്കിയതാണ് ഇപ്പോഴത്തെ പ്രശ്നങ്ങള്ക്കു കാരണമെന്നും ഒട്ടേറെ പ്രഗല്ഭര് ഭരിച്ച വകുപ്പാണെന്നു മന്ത്രി കൃഷ്ണന്കുട്ടി തിരിച്ചറിയണമെന്നും മറ്റുമായിരുന്നു മണിയുടെ വിമര്ശനം. നയവ്യതിയാനം സംഭവിച്ചതായി ആരും ആക്ഷേപിക്കുന്നില്ല. ഒന്നാം പിണറായി സര്ക്കാരിന്റെ വൈദ്യുതി വകുപ്പില് കൈവരിച്ച നേട്ടങ്ങളില് ഉറച്ചുനിന്നുകൊണ്ട് കൂടുതല് നേട്ടങ്ങള് കൊയ്യാനാണു മന്ത്രി ശ്രമിക്കുന്നതെന്നു മാത്യു ടി തോമസ് പറഞ്ഞു. പൊതുമേഖലാ സ്ഥാപനങ്ങളില് സര്ക്കാരും മാനേജ്മെന്റും ജീവനക്കാരും ഒരുമനസ്സോടെ പ്രവര്ത്തിക്കുമ്പോള് നേട്ടം കൊയ്യാമെന്നു കഴിഞ്ഞകാല ഇടതു സര്ക്കാരുകള് തെളിയിച്ചിട്ടുണ്ട്. വ്യക്തി താല്പര്യമല്ല, ഇടതുനയങ്ങളാണു മന്ത്രിസഭയും മന്ത്രിയും നടപ്പാക്കുന്നത്, മാത്യു ടി തോമസ് പറഞ്ഞു.
