കണ്ണൂര് : മട്ടന്നൂര് നഗരസഭയില് നടന്ന പൊതുതെരഞ്ഞെടുപ്പിന്റെ ഫലപ്രഖ്യാപനം ഇന്ന് നടക്കും. വോട്ടെണ്ണല് രാവിലെ പത്തിന് മട്ടന്നൂര് ഹയര് സെക്കന്ഡറി സ്കൂളില് ആരംഭിക്കും. മുഴുവന് വാര്ഡുകളുടെയും ഫലം 10.40-ഓടെ അറിയാന് കഴിയും. 84.61 ശതമാനം പേര് വോട്ട് രേഖപ്പെടുത്തിയതായി സംസ്ഥാന തെരഞ്ഞെടുപ്പ് കമ്മീഷണര് എ. ഷാജഹാന് നേരത്തെ അറിയിച്ചിരുന്നു . 35 വാര്ഡുകളിലായി 14,931 പുരുഷന്മാരും 17,906 സ്ത്രീകളും വോട്ടു രേഖപ്പെടുത്തി.
ഫലം www.lsgelection.kerala.gov.in ലെ TREND -ല് ലഭിക്കും. ആകെ രണ്ടു കൗണ്ടിംഗ് ഹാളുകള് രണ്ട് റിട്ടേണിംഗ് ഓഫീസര്മാരുടെ കീഴിലായി സജ്ജമാക്കിയിട്ടുണ്ട്. ആറു ടേബിള് വീതം ആകെ 12 ടേബിളുകളിലാണ് വോട്ടെണ്ണുക. വോട്ടെണ്ണല് മൂന്നു റൗണ്ടുകളില് പൂര്ത്തിയാകും. മൂന്നു വീതം ഉദ്യോഗസ്ഥരെ ഓരോ ടേബിളിനും നിയോഗിച്ചിട്ടുണ്ട്.
