തലശ്ശേരി : സി.പി.എം പ്രവര്ത്തകന് പുന്നോല് താഴെ വയലിലെ ഹരിദാസ് വധവുമായി ബന്ധപ്പെട്ട് പോലീസ് അറസ്റ്റുചെയ്ത പ്രതികളെ കാമറയില് പകര്ത്താന് ജനറല് ആശുപത്രിയിലെത്തിയ ദൃശ്യമാധ്യമ പ്രവര്ത്തകരെ ബി.ജെ.പി പ്രവര്ത്തകര് തടഞ്ഞത് സംഘര്ഷത്തിനിടയാക്കി. അസഭ്യവര്ഷത്തോടെ മാധ്യമ പ്രവര്ത്തകരെ കൈയേറ്റം ചെയ്യാന് ശ്രമിച്ചെങ്കിലും പോലീസ് ഇടപെട്ട് തടയുകയായിരുന്നു. ആശുപത്രി വളപ്പില് ബി.ജെ.പി പ്രവര്ത്തകര് അക്രമാസക്തരായപ്പോള് നേതാക്കള് പരിസരത്തുണ്ടായിട്ടും ഇടപെട്ടില്ല.
സംഘര്ഷമുണ്ടായപ്പോള് പോലീസ് ഉദ്യോഗസ്ഥര്, കൈയേറ്റത്തിന് മുതിര്ന്നവരെ തള്ളിമാറ്റിയാണ് രംഗം ശാന്തമാക്കിയത്. ബുധനാഴ്ച ഉച്ചക്ക് രണ്ടിനാണ് സംഭവം. ഹരിദാസിനെ വെട്ടിക്കൊന്ന കേസില് ചൊവ്വാഴ്ച അറസ്റ്റിലായ ഏഴ് ബി.ജെ.പി പ്രവര്ത്തകരെയാണ് വൈദ്യപരിശോധനക്കായി ജനറല് ആശുപത്രിയിലെത്തിച്ചത്. വൈദ്യപരിശോധന കഴിഞ്ഞ് പോലീസ് വാഹനത്തില് തിരികെ കയറ്റുന്ന വിഡിയോ ചിത്രീകരിക്കുന്നതിനിടയിലാണ് ഒരുസംഘം ബി.ജെ.പിക്കാര് അസഭ്യവാക്കുകളുമായി ദൃശ്യമാധ്യമ പ്രവര്ത്തകരെ വളഞ്ഞ് കൈയേറ്റത്തിന് മുതിര്ന്നത്.
