മുംബൈ: ജോലി അല്ലെങ്കില് കുഞ്ഞ് എന്ന് തീരുമാനിക്കാന് ഒരമ്മയെ നിര്ബന്ധിക്കാനാവില്ലെന്ന് ബോംബെ ഹൈക്കോടതി. മകളുമായി പോളണ്ടിലേക്ക് മാറിത്താമസിക്കാന് അനുമതി നിഷേധിച്ച കുടുംബകോടതി വിധി റദ്ദ് ചെയ്തുകൊണ്ടായിരുന്നു ഹൈകോടതിയുടെ ഉത്തരവ്. ജസ്റ്റിസ് ഭാരതി ദാംഗ്രെയുടെ സിംഗിള് ബെഞ്ച് ജൂലൈ 8 നാണ് സുപ്രധാന വിധി പുറപ്പെടുവിച്ചത്.
ഒമ്പത് വയസ്സുള്ള മകളോടൊപ്പം പോളണ്ടിലേക്ക് മാറാന് അനുമതി തേടി യുവതി നല്കിയ ഹര്ജി കോടതി പരിഗണിക്കുകയായിരുന്നു. 2015 മുതല് ഭര്ത്താവില് നിന്നും മകളോടൊപ്പം പിരിഞ്ഞു താമസിക്കുകയാണ് ഇവര്. പൂനെയിലെ ഒരു സ്വകാര്യ സ്ഥാപനത്തില് ജോലി ചെയ്യുന്ന സ്ത്രീക്ക് കമ്പനി പോളണ്ടിലേക്ക് പ്രൊമോഷന് നല്കി. ഇതിനെതിരെ ഭര്ത്താവ് കുടുംബകോടതിയെ സമീപിച്ചു.
കുട്ടിയെ തന്നില് നിന്ന് തട്ടിയെടുത്താല് ഇനി കാണാന് കഴിയില്ലെന്ന് കാണിച്ചായിരുന്നു ഹര്ജി. റഷ്യ-യുക്രൈന് യുദ്ധം കുഞ്ഞിന്റെ സുരക്ഷയെ ബാധിക്കുമെന്നും പിതാവ് ആരോപിച്ചു. തുടര്ന്ന് കുടുംബകോടതി അമ്മയ്ക്ക് യാത്രാനുമതി നിഷേധിച്ചു. ഈ വിധിയാണ് ബോംബെ ഹൈക്കോടതി റദ്ദാക്കിയത്. പിതാവിനെ കാണാന് തടയരുതെന്നും ഹൈക്കോടതി പറഞ്ഞു. അവധിക്കാലത്ത് മകളോടൊപ്പം ഇന്ത്യയിലേക്ക് വരാന് യുവതിയോട് നിര്ദ്ദേശിച്ചു.
