ആലപ്പുഴ : മദ്യപിച്ചശേഷമുള്ള വാക്കുതര്‍ക്കത്തിനിടെ തലയ്ക്കടിയേറ്റ് യുവാവ് മരിച്ചു. ആലപ്പുഴ ജില്ലയിലെ അമ്പലപ്പുഴ തെക്കുപഞ്ചായത്ത് കക്കാഴം സ്വദേശി സന്തോഷാണ് മരിച്ചത്. അമ്പലപ്പുഴ കടപ്പുറത്താമ് സംഭവം. കൊലപാതകവുമായി ബന്ധപ്പെട്ട് സന്തോഷിന്‍റെ സഹോദരന്‍ ബിസിയെ പോലീസ് അറസ്റ്റ് ചെയ്തു. കടപ്പുറത്ത് വെച്ച്‌ മദ്യപിച്ച ഇരുവരും തമ്മില്‍ വാക്കുതര്‍ക്കം നടന്നിരുന്നതായി പ്രദേശവാസികള്‍ പറഞ്ഞു. ഇതിനു പിന്നാലെ കടപ്പുറത്തെ ഷെഡ്ഡില്‍ സന്തോഷിനെ രക്തത്തില്‍ കുളിച്ച നിലയില്‍ മത്സ്യത്തൊഴിലാളികള്‍ കണ്ടെത്തുകയായിരുന്നു. കുടുംബ വഴക്കാണ് കൊലപാതകത്തില്‍ കലാശിച്ചതെന്നാണ് വിവരം. മൃതദേഹം ആശുപത്രിയിലേക്ക് മാറ്റി.
