കുന്നംകുളം : വീട്ടില് കയറി യുവാവിനെ കുത്തിക്കൊലപ്പെടുത്തിയ കേസില് രണ്ടുപേര് അറസ്റ്റില്. കേച്ചേരി റെനില് കോളനി സ്വദേശികളായ പുഴങ്ങരയില്ലത്ത് വീട്ടില് റാഷിദ് (26), മുണ്ടുവളപ്പില് വീട്ടില് അയ്യൂബ് (28) എന്നിവരെയാണ് പോലീസ് അറസ്റ്റ് ചെയ്തത്. കേച്ചേരി കറുപ്പംവീട്ടില് പരേതനായ അബൂബക്കറിന്റെ മകന് ഫിറോസിനെ (42) കൊലപ്പെടുത്തിയ കേസിലാണ് അറസ്റ്റ്.
വെള്ളിയാഴ്ച അര്ധരാത്രി 12.30-ഓടെയാണ് കേസിനാസ്പദമായ സംഭവം. വ്യാഴാഴ്ച രാത്രി റെനില് റോഡില് വെച്ചുണ്ടായ തര്ക്കത്തിനിടെ പ്രതികളായ ഇരുവരെയും ഫിറോസ് മര്ദ്ദിച്ചിരുന്നു. വര്ഷങ്ങളായി പിന്തുടര്ന്ന് ദേഹോപദ്രവം ഏല്പ്പിച്ചിരുന്നത് ചോദ്യം ചെയ്യാന് എത്തിയതായിരുന്നു ഇരുവരും. തുടര്ന്നുണ്ടായ തര്ക്കത്തിനിടയില് ഫിറോസിനെ അയ്യൂബ് കുത്തി വീഴ്ത്തുകയായിരുന്നു.
മദ്യലഹരിയിലാണ് ഇവര് തമ്മില് അടിപിടിയുണ്ടായത്. പ്രതികള് ബൈക്കിലാണ് ഫിറോസിന്റെ വീട്ടില് എത്തിയത്. കുന്നംകുളം അസിസ്റ്റന്റ് പോലീസ് കമ്മീഷണര് ടി.എസ്. സിനോജ്, സി.ഐ വി.സി. സൂരജ് എന്നിവരുടെ നേതൃത്വത്തിലുള്ള സംഘം ആണ് അറസ്റ്റ് ചെയ്തത്. റാഷിദിനെ മാഹിയില് നിന്നാണ് പിടികൂടിയത്. പ്രതികളെ സ്ഥലത്തെത്തിച്ച് തെളിവെടുത്തു. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.
