റാന്നി : കേരളത്തിലെ നിഴലില്ലാ ദിനങ്ങളുടെ ഭാഗമായി റാന്നി ബി.ആര്.സി ശാസ്ത്രരംഗത്തിന്റെ നേതൃത്വത്തില് വിദ്യാഭ്യാസ പരിപാടിയായി നിഴലില്ലാദിനം ആചരിച്ചു. പെരുനാട് റസിഡന്ഷ്യല് ഹോസ്റ്റലിലെ കുട്ടികള്ക്ക് ക്ലാസെടുത്താണ് ദിനം മനസിലാക്കി കൊടുത്തത്. ഏപ്രിൽ 11 മുതൽ ഏപ്രിൽ 22 വരെയാണ് നിഴലില്ലാ ദിനങ്ങൾ. നാളെ ഉച്ചയ്ക്ക് 12.24 ന് ആണ് പത്തനംതിട്ട ജില്ലയിൽ നിഴലില്ലാ സമയം. നിഴൽ നീളം പൂജ്യം ആകുന്ന സമയമാണിത്.
നിഴലില്ലാ ദിന വിദ്യാഭ്യാസ പരിപാടി റാന്നി ബ്ലോക്ക് പ്രോജക്ട് കോഡിനേറ്റർ ഷാജി എ. സലാം ഉദ്ഘാടനം ചെയ്തു. സി ആർ സി കോ-ഓർഡിനേറ്റർ എസ് ദിവ്യശ്രീ, ഹോസ്റ്റൽ വാർഡൻ ബിബിൻ എന്നിവർ പ്രസംഗിച്ചു. പഴവങ്ങാടി ഗവൺമെന്റ് യുപി സ്കൂൾ അധ്യാപികയും ശാസ്ത്രരംഗം റാന്നി ഉപ ജില്ലാ കോർഡിനേറ്ററുമായ എഫ് അജിനി സമഗ്ര ശിക്ഷ കേരള റാന്നി ബിആർസിയുടെ റസിഡൻഷ്യൽ ഹോസ്റ്റലിലും ,പെരുനാട് പഞ്ചായത്ത് വിദ്യാഭ്യാസ സമിതിയിലും ക്ലാസെടുത്തു. സീറോ ഷാഡോ ഡേ ആപ്പ് പ്ലേസ്റ്റോറിൽ നിന്നും ഡൗൺലോഡ് ചെയ്താൽ ഓരോ സ്ഥലത്തും നിഴലില്ലാ സമയം എപ്പോഴാണെന്ന് കൃത്യമായി അറിയാൻ കഴിയുമെന്ന് ഷാജി എ. സലാം അറിയിച്ചു.
