കോന്നി : ഞള്ളൂർ ഉത്തരകുമരം പേരൂർ മാതൃക ഫോറെസ്റ്റ് സ്റ്റേഷന് കെട്ടിട നിർമ്മാണം അവസാനഘട്ടത്തിലേക്ക്. കെട്ടിടത്തിലേക്ക് കുടിവെള്ളം ലഭ്യമാക്കുന്നതിന് കുഴൽ കിണർ സംവിധാനമാണ് നടപ്പാക്കിയിരിക്കുന്നത്. കിണർ കുഴിക്കുന്നതിനുള്ള ഗ്രൗണ്ട് വാട്ടർ സർവേയും പൂർത്തിയായി. കെട്ടിടത്തിലേക്ക് വൈദ്യുതി കൂടി ലഭിച്ച് കഴിഞ്ഞാൽ കെട്ടിടം ഉദ്ഘാടനത്തിന് സജ്ജമാണെന്നും വനം വകുപ്പ് അധികൃതർ അറിയിച്ചു.
നബാർഡ് ഫണ്ടിൽ നിന്നും അനുവദിച്ച 95 ലക്ഷം രൂപ വിനിയോഗിച്ചാണ് കെട്ടിട നിർമ്മാണം പൂർത്തിയാക്കിയത്. കെട്ടിടം,ഡോർമെറ്ററി എന്നീ രണ്ട് കെട്ടിടങ്ങൾ ആണ് നിർമ്മിച്ചിരിക്കുന്നത്. ഫോറെസ്റ്റ് സ്റ്റേഷന് കെട്ടിടത്തിൽ ഡെപ്യൂട്ടി റൂം, സ്ട്രോങ് റൂം, സെൽ,കമ്പ്യൂട്ടർ റൂം, വനിതാ ഉദ്യോഗസ്ഥരുടെ മുറി, മൂന്ന് ശുചിമുറികൾ എന്നിവയും ഡോർമെറ്ററി കെട്ടിടത്തിൽ ആറ് മുറികൾ, ഹാൾ,ഏഴ് ശുചിമുറികൾ എന്നിവയും ആണ് ഉൾപ്പെടുന്നത്. കെട്ടിടത്തിനുള്ളിലെ നിർമ്മാണ പ്രവർത്തനങ്ങൾ ,പെയിന്റിംഗ്, മുറ്റം ടൈൽ പാകുന്ന ജോലികൾ, ചുറ്റുമതിൽ നിർമ്മാണം, ഗേറ്റ് സ്ഥാപിക്കൽ തുടങ്ങിയവയെല്ലാം പൂർത്തിയാക്കി. ഉദ്ഘാടനം ഉടൻ നടക്കുമെന്നും അധികൃതർ പറഞ്ഞു.
