ആലുവ : ഓണ്ലൈന് ബാങ്ക് തട്ടിപ്പിലൂടെ കേരളത്തില്നിന്ന് കോടികള് കവര്ന്ന കേസില് പണം ട്രാന്സ്ഫര് ചെയ്ത അക്കൗണ്ടുകള് കണ്ടെത്തിയതായി പോലീസ്. പശ്ചിമ ബംഗാളിലെ വിവിധ ബാങ്ക് അക്കൗണ്ടുകളിലേക്കാണ് തട്ടിച്ചെടുത്ത പണം മാറ്റിയിട്ടുള്ളതെന്ന് റൂറല് എസ്.പി കെ. കാര്ത്തിക് പറഞ്ഞു. നിരവധി പേര് തട്ടിപ്പിനിരയായിട്ടുണ്ടെന്നും വിവിധ സംസ്ഥാനങ്ങളിലായി വ്യാപിച്ചുകിടക്കുന്ന വലിയൊരു തട്ടിപ്പുശൃംഖലയാണിതെന്നും അദ്ദേഹം പറഞ്ഞു.
കൂടുതല് പേരുടെ അക്കൗണ്ട് വിവരങ്ങളും ഒ.ടി.പി നമ്പറും മറ്റൊരു ഫോണിലേക്ക് ചേര്ത്ത് കൊള്ള നടത്തുകയാണ് തട്ടിപ്പിന്റെ രീതി. തുടര്ച്ചയായി വരുന്ന അവധി ദിനങ്ങള് കേന്ദ്രീകരിച്ചാണ് തട്ടിപ്പ്. പണം നഷ്ടപ്പെട്ടതറിഞ്ഞാലും ഉടന് പരാതിപ്പെടാതിരിക്കാന് വേണ്ടിയാണിത്. കവര്ച്ച നടത്തിയ പണം തിരിച്ചുപിടിക്കാനുള്ള ശ്രമത്തിലാണ് പോലീസ്. തട്ടിപ്പിന് നേതൃത്വം നല്കിയ മനതോഷ് ബിശ്വാസിന്റെ കൂട്ടുപ്രതികള്ക്കായി അന്വേഷണം നടക്കുന്നുണ്ട്.
