ന്യൂഡല്ഹി : സൗജന്യ വാഗ്ദാനങ്ങള് സംബന്ധിച്ച തെരഞ്ഞെടുപ്പ് കമ്മീഷന്റെ ശുപാർശയെ എതിർത്ത് മറുപടി നല്കി പ്രതിപക്ഷ പാർട്ടികള്. പ്രതികരണം അറിയിച്ച ആറില് അഞ്ച് പാര്ട്ടികളും കമ്മീഷന്റെ നിർദേശത്തെ എതിര്ത്തു. എന്നാൽ അതേ സമയം വിഷയത്തില് പ്രതികരണം അറിയിക്കാന് കൂടുതല് സമയം തേടിയിരിക്കുകയാണ് ബിജെപി. കോണ്ഗ്രസ്, സിപിഎം, ഡിഎംകെ, ആംആദ്മി പാര്ട്ടി , എഐഎംഐഎം എന്നീ അഞ്ച് പാര്ട്ടികളാണ് നിലവില് എതിര്പ്പ് അറിയിച്ചത്.
സൗജന്യ പദ്ധതികള്ക്കെതിരെ നേരത്തെ പ്രധാനമന്ത്രി നരേന്ദ്രമോദി വിമർശനം ഉന്നയിച്ചിരുന്നു. സൗജന്യ പദ്ധതികള് രാജ്യത്തിന്റെ വികസനത്തിന് ആപത്തെന്നായിരുന്നു മോദിയുടെ വിമർശനം. അതിനാല് സ്വഭാവികമായും കമ്മീഷന്റെ നിലപാടുകളോട് യോജിച്ചാകും ബിജെപി നിലപാട്. പാര്ട്ടികളുടെ നിലപാട് കേട്ടശേഷമായിക്കും വിഷയത്തില് തെരഞ്ഞെടുപ്പ് കമ്മീഷന് തീരുമാനമെടുക്കുക.
