പന്തളം: സി.പി.എമ്മിന്റ പന്തളത്തെ പ്രഥമ ഏരിയ സെക്രട്ടറിയുടെ മകന് പാര്ട്ടി വിട്ടു. പന്തളം ഏരിയ സമ്മേളനം ഡിസംബര് 11, 12 തീയതികളില് കുരമ്പാലയില് നടക്കാന് ഒരുങ്ങുന്നതിനിടെയാണ് 50 വര്ഷമായി സി.പി.എമ്മിന്റ സജീവപ്രവര്ത്തകനും മുന് കൗണ്സിലറുമായ ഷാ കോടാലിപറമ്പില് പാര്ട്ടി വിട്ടത്. ആദ്യകാല കമ്യൂണിസ്റ്റ് നേതാവും കര്ഷക സംഘത്തിെന്റ ആദ്യകാല ചുമതലക്കാരനുമായ കെ.എ. അബ്ദുല് കരീമിന്റെ മകനാണ്.
സി.പി.എമ്മുമായുള്ള ബന്ധം ഉപേക്ഷിച്ചതായി അദ്ദേഹം പറഞ്ഞു. ഷാ കോടാലിപറമ്പില് ഈ കഴിഞ്ഞ ബ്രാഞ്ച്, ലോക്കല് സമ്മേളനങ്ങളില് സജീവമായി പങ്കെടുത്തിരുന്നു. പന്തളം ഏരിയയിലെ ലോക്കല് സമ്മേളനങ്ങളില് ന്യൂനപക്ഷ വിഭാഗങ്ങളെ വെട്ടിനിരത്തിയെന്ന് ആരോപണം ഉയരുന്നുണ്ട്. അരനൂറ്റാണ്ടിലധികമായി പാര്ട്ടിയില് ഉറച്ചുനിന്ന കുടുംബമാണ് ഇവരുടെത്.
മുടിയൂര്ക്കോണം ലോക്കല് സമ്മേളനത്തില് അബ്ദുല് കരീമിന്റെ മകള് റമീ കപൂറിനെ ലോക്കല് കമ്മിറ്റിയില്നിന്ന് ഒഴിവാക്കിയിരുന്നു. മകന് ഷാ കോടാലിപ്പറമ്പിലിനെ പരിഗണിക്കുകപോലും ചെയ്യാതിരുന്നതാണ് ഈ കുടുംബം സി.പി.എം ബന്ധം ഉപേക്ഷിക്കാന് കാരണമായതെന്ന് കുടുംബാംഗങ്ങള് പറയുന്നു.
വ്യാഴാഴ്ച നടന്ന അബ്ദുല് കരീം അനുസ്മരണത്തില്നിന്ന് കുടുംബം വിട്ടുനിന്നു. കടുത്ത നിയന്ത്രണങ്ങളില് നടന്ന ലോക്കല് സമ്മേളനങ്ങളെ കടത്തിവെട്ടി ഏരിയ സമ്മേളനം ചൂടുള്ള ചര്ച്ചകള്ക്ക് വേദിയാകും. പാര്ട്ടി അവഗണനയെക്കുറിച്ച് ജില്ലസമ്മേളനത്തിന് മുമ്പ് വിശദീകരിക്കുമെന്നും ഷാ കോടാലിപറമ്പില് പറഞ്ഞു.
