പത്തനംതിട്ട : ഹോംവര്ക്ക് ചെയ്യാത്തതിന്റെ പേരില് മൂന്നാം ക്ലാസ് വിദ്യാര്ഥിയെ അധ്യാപിക മര്ദ്ദിച്ച സംഭവത്തില് മനുഷ്യാവകാശ കമ്മിഷന് കേസെടുത്തു. വിവരാവകാശ പ്രവര്ത്തകന് റഷീദ് ആനപ്പാറ നല്കിയ പരാതിയെ തുടര്ന്നാണ് കമ്മിഷന്റെ നടപടി. പരുമല സെമിനാരി എല്പിഎസിലെ മൂന്നാം ക്ലാസുകാരനാണ് മണിയമ്മ എന്ന താല്കാലിക അധ്യാപികയില് നിന്നും അടികൊണ്ടത്. രാവിലെയും വൈകിട്ടുമായി അധ്യാപിക 25 തവണ മര്ദിച്ചു. കുട്ടിയെ സ്കൂളില് നിന്നും തിരികെ വിളിക്കാനായി മുത്തച്ഛന് എത്തുമ്പോള് മുളങ്കമ്പ് ഉപയോഗിച്ച് അധ്യാപിക കൈയിലും കാലിലുമായി അടിക്കുന്നത് കണ്ടു.
തുടര്ന്ന് മുത്തച്ഛന് കുട്ടിയുമായി വീട്ടിലേക്ക് മടങ്ങി. വീട്ടിലെത്തിയ കുട്ടി മര്ദ്ദന വിവരം രക്ഷിതാക്കളോട് പറഞ്ഞു. ഇടത് വലത് കൈകളുടെ തോള് മുതല് താഴേക്കും കൈത്തണ്ടകളിലും അടിയേറ്റ് തിണര്ത്ത പാടുകള് കണ്ടതോടെ പിതാവ് വിഷ്ണു കുട്ടിയെ തിരുവല്ല താലൂക്ക് ആശുപത്രിയില് പ്രവേശിപ്പിച്ചു എന്നുമുള്ള മാധ്യമ വാര്ത്ത സഹിതം ചൂണ്ടിക്കാട്ടിയാണ് റഷീദ് മനുഷ്യാവകാശ കമ്മിഷന് പരാതി നല്കിയത്.
