കോഴഞ്ചേരി: 2018ലെ മഹാപ്രളയത്തേ തുടർന്ന് അടച്ചുപൂട്ടിയ കോഴഞ്ചേരിയിലെ ഹാന്റെക്സ് ഷോറൂം പ്രവർത്തനം തുടങ്ങാൻ നടപടികളായി. അനിശ്ചിതമായി പൂട്ടിയിട്ടിരുന്ന ഹാന്റക്സ് ഷോറൂം തുറക്കുന്നതു സംബന്ധിച്ച് ഇലന്തൂര് ബ്ലോക്ക് പഞ്ചായത്ത് പ്രസിഡന്റായിരുന്ന ജെറി മാത്യു സാം 2019 ല് മന്ത്രി ഇ. പി. ജയരാജന്റെ ശ്രദ്ധയില് കൊണ്ടുവന്നതിനേ തുടർന്നാണ് ഷോറൂം പുനരുദ്ധാരണം നടത്തി തുറക്കാന് നടപടി സ്വീകരിച്ചത്.
ഡിപ്പോയില് വെള്ളം കയറിയതിനെ തുടര്ന്ന് തുണിത്തരങ്ങള്, കംപ്യൂട്ടര്, ഫര്ണീച്ചറുകള്, അലമാരകള് എന്നിവയെല്ലാം നശിച്ചുപോയിരുന്നു. കൂടാതെ ഡിപ്പോ മാനേജര് പദവി വഹിച്ചിരുന്ന വി. പി.അനില കുമാരി സർവീസില് നിന്നും വിരമിക്കുകയും ചെയ്തിരുന്നു. അതിനാല് നടപടിക്രമങ്ങള് പെട്ടെന്ന് പൂര്ത്തിയാക്കി തുറക്കാനുള്ള തയ്യാറെടുപ്പുകളാണ് ഇപ്പോള് നടന്നു വരുന്നത്.
