പത്തനംതിട്ട: പെരുനാട് സബ്ട്രഷറിയില് നടന്ന സാമ്പത്തിക തട്ടിപ്പില് ക്രൈംബ്രാഞ്ച് അന്വേഷണം ജില്ല ട്രഷറിയിലേക്ക്. തട്ടിപ്പിന്റെ മുഖ്യപങ്കും നടന്നത് ജില്ല ട്രഷറിയില് വെച്ചായിരുന്നു എന്ന് സൂചന കിട്ടിയതിന്റെ അടിസ്ഥാനത്തിലാണ് അന്വേഷണം ജില്ല ട്രഷറിയിലേക്ക് വ്യാപിപ്പിച്ചത്. ക്രൈംബ്രാഞ്ച് ഡിവൈ.എസ്.പി ഉമേഷ് കുമാറിന്റെ നേതൃത്വത്തിലുള്ള സംഘം ബുധനാഴ്ച സബ്ട്രഷറിയിലെയും ജില്ല ട്രഷറിയിലെയും ജീവനക്കാരില്നിന്ന് മൊഴിയെടുത്തു. കമ്പ്യൂട്ടറിലെ വിവരങ്ങളും പരിശോധിച്ചു. പ്രാഥമിക നിഗമത്തില് തട്ടിപ്പ് നടന്നതായാണ് ക്രൈംബ്രാഞ്ച് സംഘം വിലയിരുത്തുന്നത്.
ജില്ല ട്രഷറിയിലെ സ്റ്റാമ്പ് ഡ്യൂട്ടി ഓഫീസറെയടക്കം ചോദ്യംചെയ്തു. ഇതിനിടെ തട്ടിപ്പിന്റെ മുഖ്യ ആസൂത്രകന് പെരുനാട് സബ്ട്രഷറി സീനിയര് ട്രഷറര് സി.ടി. ഷഹീര് മുന്കൂര് ജാമ്യo തേടിയതായി സൂചനയുണ്ട്. മരണമടഞ്ഞ ഓമല്ലൂര് സ്വദേശിനി പെന്ഷണറുടെ സ്ഥിരനിക്ഷേപത്തിലെയും സേവിങ്സ് അക്കൗണ്ടിലെയും 8.13 ലക്ഷം രൂപ വ്യാജ അക്കൗണ്ടുണ്ടാക്കിയാണ് ഇയാള് തട്ടിയെടുത്തത്. പെരുനാട് സബ് ട്രഷറിയിലേക്ക് സ്ഥലം മാറിപ്പോയ ഇയാള് അവിടെയും തട്ടിപ്പ് ആവര്ത്തിച്ചപ്പോളാണ് സഹപ്രവര്ത്തകര് കണ്ടെത്തിയത്.
ട്രഷറി ഓഫീസറുടെ പരാതിയെ തുടര്ന്ന് പെരുനാട് പോലീസ് കേസെടുത്തെങ്കിലും രണ്ടാഴ്ചയായിട്ടും ഒരുനടപടിയും എടുക്കാതായതോടെയാണ് കേസ് ജില്ല പോലീസ് മേധാവി ക്രൈംബ്രാഞ്ചിന് കൈമാറിയത്. ഷഹീറടക്കം നാലുപേരെ സസ്പെന്ഡ് ചെയ്തിട്ടുണ്ടെങ്കിലും ആരെയും ഇതുവരെ പിടികൂടിയിട്ടില്ല. മറ്റ് ജീവനക്കാരുടെ ട്രഷറി കോഡും പാസ് വേര്ഡും ഉപയോഗിച്ചാണ് തട്ടിപ്പ് നടത്തിയതെന്നാണ് ട്രഷറി ഡെപ്യൂട്ടി ഡയറക്ടര് നടത്തിയ അന്വേഷണത്തില് കണ്ടെത്തിയത്.
