തിരുവനന്തപുരം : വിശ്വസാഹിത്യരംഗത്തെ അതികായനായ റഷ്യന് സാഹിത്യകാരന് ഫയദോര് ദസ്തയേവ്സ്കിയുടെ ജീവിതത്തിലേക്ക് ശ്രദ്ധക്ഷണിച്ച് തിരുവനന്തപുരം പബ്ലിക് ലൈബ്രറി സംഘടിപ്പിക്കുന്ന ഫോട്ടോ പ്രദര്ശനം ജനുവരി 31 ന് സമാപിക്കും. രാവിലെ എട്ടുമുതല് വൈകീട്ട് ആറുവരെയാണ് പ്രദര്ശന സമയം. ദസ്തയേവ്സ്കിയുടെ ജീവിതത്തെക്കുറിച്ചും കൃതികളെക്കുറിച്ചും പ്രദര്ശനത്തില് വിവരിക്കുന്നു. പ്രധാന കൃതികള്, എഴുതിയ വര്ഷം, പൂര്ണമായ ജീവിതരേഖ, ജോസഫ് ഫ്രാങ്ക് എഴുതിയ ജീവചരിത്ര ഗ്രന്ഥ വിവരങ്ങള് എന്നിവയും പ്രദര്ശനത്തിലുണ്ട്. 1950 കള് മുതല് മലയാളികള് ആരാധിച്ച ദസ്തയേവ്സ്കിയെക്കുറിച്ച് പറയുന്ന ഭാഗമാണ് ദസ്തയേവ്സ്കി മലയാളത്തില് എന്ന വിഭാഗത്തിലുള്ളത്. ഇടപ്പള്ളി കരുണാകര മേനോന്, എന്.കെ ദാമോദരന്, വേണു വി ദേശം എന്നിവരെ ഇവിടെ അവതരിപ്പിക്കുന്നു. ആഫ്രിക്കന് എഴുത്തുകാരന് കൂറ്റ്സി, പെരുമ്പടവം ശ്രീധരന് എന്നിവര് എഴുതിയ ദസ്തയേവ്സ്കി കഥാപാത്രമായ നോവലുകളെക്കുറിച്ചും അവലംബിത ചലച്ചിത്രങ്ങളെക്കുറിച്ചും പ്രദര്ശനത്തില് പരാമര്ശിക്കുന്നു.
രണ്ടു നൂറ്റാണ്ടുകള്ക്ക് മുമ്ബുള്ള ഫോട്ടോകള് കിട്ടാന് പ്രയാസം നേരിട്ടെന്ന് പ്രദര്ശന ചുമതല വഹിക്കുന്ന സീനിയര് ഡെപ്യൂട്ടി സ്റ്റേറ്റ് ലൈബ്രറിയന് പി.യു അശോകന് പറഞ്ഞു. ഫോട്ടോകള് സ്കാന് ചെയ്ത് റെസലൂഷന് കൂട്ടി ആവശ്യമായ അടിക്കുറിപ്പുകളോടെ 50 മീറ്റര് നീളത്തില് ദൃശ്യഭംഗി കിട്ടുന്ന വിധത്തില് ക്രമീകരിക്കണമെന്ന ആശയം മാസങ്ങള്ക്ക് മുമ്പേ ഉണ്ടായിരുന്നു. അതിന്റെ അടിസ്ഥാനത്തിലാണ് മേല്ത്തരം തുണിയില് ചിത്രങ്ങള് പ്രിന്റ് ചെയ്ത് തുറന്ന പ്രതലത്തില് ചിത്രങ്ങള് പ്രദര്ശിപ്പിക്കുന്നത്. ദസ്തയേവ്സ്കിയുടെ ജീവചരിത്രകാരനായ ജോസഫ് ഫ്രാങ്കിന്റെ അഞ്ചു വോള്യങ്ങളുള്ള പുസ്തകത്തെയാണ് ഫോട്ടോകള്ക്കായി മുഖ്യമായി ആശ്രയിച്ചത്. തിരുവനന്തപുരത്തെ റഷ്യന് ഹൗസില്നിന്ന് കുറേ ഫോട്ടോകള് കിട്ടിയിരുന്നു.
