കല്ലടിക്കോട് : പിക്അപ് വാനും ജീപ്പും കൂട്ടിയിടിച്ച് 11 പേര്ക്ക് പരിക്ക്. പാലക്കാട് -കോഴിക്കോട് ദേശീയപാതയില് കരിമ്പക്കടുത്ത് പനയമ്പാടത്ത് കാഞ്ഞിരം പൂഞ്ചോലയില് നിന്ന് വടക്കാഞ്ചേരിയിലേക്ക് ധ്യാനത്തിന് പോകുന്നവര് സഞ്ചരിച്ച ജീപ്പ് ആണ് അപകടത്തില്പ്പെട്ടത്. കാഞ്ഞിരപ്പുഴ കാഞ്ഞിരം പൂഞ്ചോല പട്ടികവര്ഗ കോളനി നിവാസികളായ ശാന്ത (75), ലത (30), മീനാക്ഷി (60), പ്രീത (30), ശശി (80), മാധവി (50), ഓമന (34), വെള്ള (67), വിവേക് (30), രാജേഷ് (34), ലീന (39) എന്നിവര്ക്കാണ് പരിക്കേറ്റത്. ഇവരെ വട്ടമ്പലം മദര് കെയര് ആശുപത്രിയില് പ്രവേശിപ്പിച്ചു. ഇവരില് ശാന്തയുടെ പരിക്ക് സാരമുള്ളതാണ്.
അപകടത്തില് പെട്ടവരെ നാട്ടുകാരും പോലീസും ചേര്ന്നാണ് ആശുപത്രിയില് പ്രവേശിപ്പിച്ചത്. മഴ പെയ്താല് സ്ഥിരമായി അപകടമുണ്ടാവുന്ന പ്രദേശമാണിത്. റോഡ് നവീകരണത്തിനു ശേഷം 87ാമത് അപകടമാണിത്. നാല് പേര് ഈ ഭാഗത്തുണ്ടായ അപകടത്തില് മരിച്ചിരുന്നു. റോഡ് നിര്മാണത്തിലെ അപാകതയാണ് അപകടങ്ങള്ക്ക് കാരണമെന്ന് നാട്ടുകാര് ആരോപിച്ചു.
