തിരുവനന്തപുരം: കൊറോണ നെഗറ്റീവ് സര്ട്ടിഫിക്കറ്റ് നിര്ബന്ധമാക്കേണ്ടെന്ന മന്ത്രിസഭാ തീരുമാനം ജനരോഷത്തിന് മുന്നില് ഒരിക്കല്ക്കൂടി മുഖ്യമന്ത്രി മുട്ടുമടക്കിയതിന് തെളിവാണെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രന് പറഞ്ഞു. മുഖ്യമന്ത്രിയുടെ ധാര്ഷ്ട്യത്തിനും ധിക്കാരത്തിനുമേറ്റ തിരിച്ചടി കൂടിയാണിത്. അമിത വൈദ്യുതി ബില്ലിലും സ്പ്രിങ്കളര് വിവാദത്തിലും കോണ്ഗ്രസ് സമരം ശക്തമാക്കിയപ്പോഴാണ് മുഖ്യമന്ത്രിക്ക് ബോധോദയമുണ്ടായത്. മുഖ്യമന്ത്രിക്ക് സ്വതന്ത്രമായി ചിന്തിക്കാനുള്ള ശേഷി നഷ്ടമായെന്നും മുല്ലപ്പള്ളി വ്യക്തമാക്കി.
കൊറോണ നെഗറ്റീവ് സര്ട്ടിഫിക്കറ്റ് വേണമെന്ന കാര്യത്തില് കടുംപിടിത്തം പാടില്ലെന്ന് കോണ്ഗ്രസും യുഡിഎഫും മുഖ്യമന്ത്രിയോട് ആവശ്യപ്പെട്ടതാണ്. അത് അപ്രായോഗികവും പ്രവാസികള്ക്ക് കടുത്ത ബുദ്ധിമുട്ടുണ്ടാക്കുന്നതുമാണ്. എല്ലാ കാര്യത്തിലും മുഖ്യമന്ത്രിയുടെ സമീപനം ഇതുതന്നെയാണ്. ഉപദേശക വൃന്ദത്തിന്റെയും പി.ആര് സംഘത്തിന്റെയും തടവറയിലാണ് മുഖ്യമന്ത്രി. മികച്ച ഉപദേശങ്ങള് കൊടുക്കാന് കഴിവും കാര്യശേഷിയുമുള്ള ഉദ്യോഗസ്ഥര് കേരളത്തിലുണ്ട്.
എന്നാല് ഒന്നുകില് മുഖ്യമന്ത്രി അവരുടെ ഉപദേശങ്ങള് കേള്ക്കുന്നില്ല, അല്ലെങ്കില് ഉദ്യോഗസ്ഥര് ഉപദേശങ്ങള് നല്കാന് തയ്യാറാകുന്നില്ലായെന്ന് കരുതേണ്ടിവരും. കേരളത്തിലേക്കുള്ള പ്രവാസികളുടെ വരവ് എങ്ങനെയും തടയാനാണ് തുടക്കം മുതല് മുഖ്യമന്ത്രിയും കേരള സര്ക്കാരും ശ്രമിച്ചത്. അതിനെതിരെയാണ് കോണ്ഗ്രസും പ്രതിപക്ഷ പാര്ട്ടികളും സമരമുഖത്ത് ഇറങ്ങിയതും. പ്രതിപക്ഷ സമരത്തെ പരിഹസിച്ച മുഖ്യമന്ത്രി ഇപ്പോള് സ്വന്തം തെറ്റുതിരുത്താന് തയ്യാറായത് നല്ലതാണെന്ന് മുല്ലപ്പള്ളി പറഞ്ഞു.
